ព្យុះទីហ្វុង Lupit បង្ខំឲ្យ ចិន ជម្លៀសប្រជាជនជិត ៦ ម៉ឺននាក់ចេញពីខេត្តជាប់មាត់សមុទ្រ

ប្រព័ន្ធផ្សព្វផ្សាយជាតិចិន បានរាយការណ៍កាលពីថ្ងៃព្រហស្បតិ៍ថា អាជ្ញាធរនៃខេត្ត Fujian និងខេត្ត Guangdong នៅភាគអាគ្នេយ៍ប្រទេសចិន បានជម្លៀសប្រជាជនជិត ៦ ម៉ឺននាក់ចេញពីតំបន់ឆ្នេរ ដោយសារព្យុះទីហ្វុង Lupit ។

ដោយដកស្រង់ពីមជ្ឈមណ្ឌលឧតុនិយមជាតិ (NMC) ទីភ្នាក់ងារព័ត៌មាន Xinhua បានរាយការណ៍ថា ព្យុះទីហ្វុងនេះបានបោកបក់មកលើខេត្ត Guangdong ភាគខាងត្បូងនៅវេលាម៉ោង ១១ និង ២០ នាទីថ្ងៃត្រង់ថ្ងៃព្រហស្បតិ៍ ហើយមនុស្សជាង ៣៣,០០០ នាក់ ដែលកំពុងរស់នៅក្នុងតំបន់រងផលប៉ះពាល់ ត្រូវបានជម្លៀសចេញនៅពេលល្ងាច ។

យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា ខេត្ត Fujian មានភ្លៀងធ្លាក់ខ្លាំងនៅតាមទីក្រុងមួយចំនួនកាលពីថ្ងៃព្រហស្បតិ៍ ខណៈមនុស្សជាង ២៥,០០០ នាក់ត្រូវបានជម្លៀសរួចទៅហើយ ។

លើសពីនេះទូកនេសាទទាំងអស់ ត្រូវបានបញ្ជាឲ្យចូលចតនៅកំពង់ផែដែលនៅជិតបំផុត ហើយសកម្មភាពទេសចរណ៍នៅសមុទ្រត្រូវផ្អាក ។ ចំណែកប្រតិបត្តិការរថភ្លើងល្បឿនលឿន និងសាឡាងនៅខេត្ត Fujian ត្រូវបានបញ្ឈប់ជាបណ្តោះអាសន្ន ។

ទន្ទឹមនោះ អ្នកឧតុនិយមជឿជាក់ថា ព្យុះទីហ្វុងនេះនឹងជះឥទ្ធិពលដល់តំបន់ផ្សេងទៀត ក្នុងរយៈពេល ៣ ថ្ងៃដែលបង្កឡើងដោយភ្លៀងធ្លាក់ខ្លាំង បន្ទាប់ពីប្រទេសចិនបានប្រកាសកម្រិតអាសន្នទី ៤ ដោយសារព្យុះទីហ្វុង Lupit នេះ ៕

ប្រែសម្រួលដោយ ៖ ជីវ័ន្ត

ប្រភព ៖ Apa

ចុចអាន ៖ ព្យុះទីហ្វុង មួយទៀតកំពុងបោកបក់មកលើប្រទេស ចិន