សមាជិកព្រឹទ្ធសភារដ្ឋ Arizona ត្រូវចាប់ខ្លួនពីបទ រំលោភបំពានផ្លូវភេទ អនីតិជន

សមាជិកព្រឹទ្ធសភារដ្ឋ Arizona ម្នាក់ ត្រូវបានចាប់ខ្លួនពីបទប្រព្រឹត្តអំពើផ្លូវភេទជាមួយអនីតិជន ដែលបង្កឲ្យមានការអំពាវនាវពីអ្នកប្រជាធិបតេយ្យ ឲ្យគាត់លាលែងពីតំណែង។

នាយកដ្ឋានប៉ូលិសទីក្រុង Phoenix បាននិយាយនៅក្នុងសេចក្តីថ្លែងការណ៍មួយថា សមាជិកព្រឹទ្ធសភាឈ្មោះ Tony Navarrete ត្រៀមបញ្ជូនទៅកាន់ពន្ធនាគារកាលពីថ្ងៃព្រហស្បតិ៍។ គាត់ត្រូវប្រឈមមុខនឹងការចោទប្រកាន់ពីបទរំលោភផ្លូវភេទជាមួយអនីតិជន និងការចោទប្រកាន់ផ្សេងទៀត។

នាយកដ្ឋានបន្តថា ខ្លួនបានទទួលរបាយការណ៍មួយកាលពីថ្ងៃពុធ អំពីឧប្បត្តិហេតុដែលកើតឡើងនៅក្នុងឆ្នាំ២០១៩។ ក្រុមអ្នកស៊ើបអង្កេត បានសម្ភាសជនរងគ្រោះនិងសាក្សីជាអនីតិជន ហើយបានរកមូលហេតុដែលអាចចាប់ខ្លួនលោក Navarrete នៅថ្ងៃបន្ទាប់។

សារព័ត៌មានក្នុងតំបន់ The Arizona Mirror បានរាយការណ៍ថា លោក Navarrete ត្រូវបានចោទប្រកាន់ពីបទឧក្រិដ្ឋកម្មចំនួន ៧ ករណី ទាក់ទងនឹងការប្រព្រឹត្តអំពើផ្លូវភេទជាមួយអនីតិជន ប៉ុនប៉ងប្រព្រឹត្តអំពើផ្លូវភេទជាមួយអនីតិជន និងការរំលោភបំពានផ្លូវភេទ។ គាត់ត្រូវបានធានាឲ្យនៅក្រៅឃុំជាមួយទឹកប្រាក់ចំនួន ៥ ម៉ឺនដុល្លារ។

បន្ទាប់ពីការបង្ហាញខ្លួននៅតុលាការជាលើកដំបូងកាលពីថ្ងៃសុក្រ សភារដ្ឋ Arizona និងក្រុមប្រឹក្សាសន្តិសុខព្រឹទ្ធសភា បានចេញសេចក្តីថ្លែងការណ៍រួមមួយ ដែលអំពាវនាវឲ្យលោក Navarrete លាលែងពីតំណែង។

អ្នកប្រជាធិបតេយ្យកំពូលពីររូបរបស់រដ្ឋ Arizona ក៏បានអំពាវនាវឲ្យគាត់ ចុះចេញពីតំណែងផងដែរកាលពីថ្ងៃសុក្រ៕

ប្រែសម្រួល៖ Vann Vann

ប្រភព៖ The Hill

ចុចអាន៖ CNN ដេញចោលបុគ្គលិក ៣នាក់ ព្រោះអត់ចាក់វ៉ាក់សាំង មកធ្វើការ