ស្ងាត់ៗ ឥណ្ឌា អនុម័តប្រើប្រាស់វ៉ាក់សាំងចាក់តែមួយដូស Johnson & Johnson

រដ្ឋមន្រ្តីក្រសួងសុខាភិបាលឥណ្ឌាបានប្រកាសកាលពីថ្ងៃសៅរ៍ថា ប្រទេសឥណ្ឌាបានអនុម័តវ៉ាក់សាំងការពារជំងឺកូវីដ ១៩ ចាក់តែមួយដូសរបស់ក្រុមហ៊ុនផលិតឱសថអាមេរិក Johnson & Johnson សម្រាប់ប្រើប្រាស់ជាបន្ទាន់ ។

ទន្ទឹមនោះ លោក Mansukh Mandaviya បាននិយាយនៅលើបណ្តាញសង្គម Twitter ថា “ឥណ្ឌាបានពង្រីកកញ្ចប់វ៉ាក់សាំងរបស់ខ្លួន ហើយវ៉ាក់សាំងការពារជំងឺកូវីដ ១៩ ចាក់តែមួយដូស Johnson & Johnson ត្រូវបានផ្តល់ការយល់ព្រមសម្រាប់ការប្រើប្រាស់ជាបន្ទាន់នៅឥណ្ឌា ។ វ៉ាក់សាំងនេះនឹងជួយជំរុញការប្រយុទ្ធរួមគ្នារបស់ប្រទេសយើង ប្រឆាំងនឹងជំងឺកូវីដ ១៩” ។

កន្លងមក វ៉ាក់សាំង Johnson & Johnson បានប្រឈមមុខនឹងភាពចម្រូងចម្រាសចំពោះរបាយការណ៍នៃករណីដុំកំណកឈាម ។ វ៉ាក់សាំងនេះក៏ត្រូវបានបញ្ឈប់មួយរយៈពេលខ្លីផងដែរ នៅអាមេរិកកាលពីខែមេសា ប៉ុន្តែការផ្អាកនេះត្រូវបានអាជ្ញាធរដកចេញភ្លាមៗ ។

ក្រសួងសុខាភិបាលឥណ្ឌាបាននិយាយកាលពីថ្ងៃសៅរ៍ថា ប្រទេសឥណ្ឌាបានកត់ត្រាករណីឆ្លងថ្មីចំនួន ៣៨,៦២៨ ករណីក្នុងរយៈពេល ២៤ ម៉ោងចុងក្រោយ ដែលធ្វើឲ្យករណីឆ្លងសរុបកើនដល់ ៣១.៨ លានករណី ខណៈមានអ្នកស្លាប់ថ្មីចំនួន ៦១៧ នាក់ និងបង្កើនចំនួនអ្នកស្លាប់ទូទាំងប្រទេសដល់ ៤២៧,៣៧១ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លែងព្រួយ ពេលដឹងច្បាស់ អំពី​វ៉ាក់សាំង Johnson & Johnson ដែលកម្ពុជា នឹងទទួលបានពី អាមេរិក