ប្រទេសអាស៊ីអាគ្នេយ៍មួយទៀតរកឃើញករណីឆ្លង វីរុសបំប្លែងខ្លួនឥណ្ឌា Delta ចូលក្នុងសហគមន៍ជាលើកដំបូង

ទីម័រខាងកើតបានកត់ត្រាករណីឆ្លងវីរុសបំប្លែងខ្លួនឥណ្ឌា “Delta” ចូលក្នុងសហគមន៍ជាលើកដំបូង ហើយកំពុងបង្កឲ្យមានការព្រួយបារម្ភយ៉ាងខ្លាំង ដល់ក្រសួងសុខាភិបាលរបស់ខ្លួនអំពីការកើនឡើងករណីឆ្លងនេះ ។

ការធ្វើតេស្តហ្សែនដោយវិទ្យាស្ថាន Doherty របស់អូស្រ្តាលីនៅសប្តាហ៍ដំបូងនៃខែសីហា បានរកឃើញថា ក្នុងចំណោមសំណាកចំនួន ២៧ ដែលបានយកនៅក្នុងតំបន់ Ermera របស់ប្រទេសទីម័រខាងកើត ពីអ្នកដែលឆ្លងជំងឺកូវីដ ១៩ ក្នុងនោះ ១២ នាក់ជាវីរុសបំប្លែងខ្លួនឥណ្ឌា “Delta” ។

ទន្ទឹមនោះ សំណាកពីតំបន់ផ្សេងទៀតមិនទាន់ត្រូវបានធ្វើតេស្តនៅឡើយទេ ប៉ុន្តែអ្នកជំនាញសុខភាពសាធារណៈបាននិយាយថា ចំនួនករណីដែលកំពុងកើនឡើងនៅកន្លែងផ្សេងទៀតនៅក្នុងប្រទេស ក៏អាចមានវត្តមានវីរុសបំប្លែងខ្លួនឥណ្ឌា “Delta” នៅទីនោះដែរ ។

ក្រសួងសុខាភិបាលនៅក្នុងរបាយការណ៍ថ្ងៃទី ៨ ខែសីហា បាននិយាយថា ការចម្លងវីរុសបំប្លែងខ្លួនឥណ្ឌា “Delta” ទំនងជាបង្កឲ្យមានការកើនឡើងគួរឲ្យកត់សម្គាល់នូវករណីឆ្លង រួមទាំងករណីធ្ងន់ធ្ងរ និងការស្លាប់ផងដែរ ដោយសារអ្នកទាំងនោះមានលទ្ធភាពទទួលវ៉ាក់សាំងតិចតួច ហើយកំពុងមានហានិភ័យបំផុត ។

រហូតមកដល់ពេលនេះប្រហែល ៨.៥ ភាគរយនៃប្រជាជន ១.៣ លាននាក់របស់ខ្លួន ត្រូវបានចាក់វ៉ាក់សាំងពេញ ២ ដូសដោយប្រើវ៉ាក់សាំង AstraZeneca និង Sinovac ។

គួរបញ្ជាក់ថា ប្រទេសនៅអាស៊ីអាគ្នេយ៍មួយនេះបានកត់ត្រាករណីឆ្លងជំងឺកូវីដ ១៩ សរុបចំនួន ១១,៥៧៩ ករណី និងមានអ្នកស្លាប់ចំនួន ២៨ នាក់ ចាប់តាំងពីការផ្ទុះឡើងនៃរោគរាតត្បាត ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ វីរុសបំប្លែងខ្លួនឥណ្ឌា Delta ជាភ្នាក់ងារបង្ករោគច្រើនជាងប្រភេទផ្សេងទៀតទាំងអស់