អ្នកជំនាញព្រមានថា ៣-៤ខែទៀត វីរុសបំប្លែងខ្លួនឆ្លងសាហាវជាង Delta នឹងវាយលុក សហរដ្ឋអាមេរិក

លោកវេជ្ជបណ្ឌិត Robert Redfield អតីតនាយកមជ្ឈមណ្ឌលគ្រប់គ្រងនិងបង្ការជំងឺ (CDC) បានព្យាករណ៍ថា រដូវស្លឹកឈើជ្រុះ នឹងក្លាយជាពេលវេលាដ៏ខ្មៅងងឹត នៅក្នុងវិបត្តិជំងឺរាតត្បាត កូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Redfield បាននិយាយនៅក្នុងកម្មវិធី “The Story” របស់ទូរទស្សន៍ Fox News ថា លោកគិតថា វីរុសកូវីដ-១៩ នឹងបន្តបំបែកខ្លួនយ៉ាងឆាប់រហ័ស ក្នុងចំណោមមនុស្ស ដូច្នេះហើយ ហានិភ័យនៃការវិវត្តរបស់វីរុសបំប្លែងខ្លួនគឺ ខ្ពស់ណាស់។

អ្នកដឹងទេ យើងបានដោះស្រាយជាមួយវីរុសបំប្លែងខ្លួនអង់គ្លេស។ អ្នករាល់គ្នាគិតថា វាអាក្រក់ណាស់ វាឆ្លងខ្លាំងជាងមេរោគដើម ពីរដង ប៉ុន្តែ បីបួនខែក្រោយមក យើងមាន Delta ទៀត ហើយឥឡូវនេះវាជាវីរុសបំប្លែងខ្លួនលេចធ្លោបំផុត នៅសហរដ្ឋអាមេរិក។

បន្ទាប់មក លោកបានព្យាករណ៍ថា នឹងមានវីរុសកូវីដ-១៩បំប្លែងខ្លួនដែលគ្រោះថ្នាក់ជាងនេះទៀត នៅត្រឹមរដូវស្លឹកឈើជ្រុះ។ 

កូវីដ បានក្លាយជាមេរោគឆ្លងខ្លាំងបំផុតមួយនៅក្នុងខ្លួនមនុស្ស ដែលអនុញ្ញាតឲ្យវាបំប្លែងខ្លួន លឿនជាងមុន។

ការអត្ថាធិប្បាយរបស់លោក Redfield បានកើតឡើង ស្របពេលអ្នកជំនាញផ្សេងទៀត បានព្រមានអំពីវីរុសបំប្លែងខ្លួនថ្មីៗ ដែលអាចលេចចេញនាពេលអនាគត។

ថ្មីៗនេះ អ្នកវិទ្យាសាស្ត្រមួយចំនួនធំបានប្រាប់ Newsweek ថា មានសក្តានុពលដែលវ៉ាក់សាំង មិនអាចបញ្ឈប់វីរុសបំប្លែងខ្លួនបាន៕

ប្រែសម្រួល៖ Vann Vann

ប្រភព៖ Deseret

ចុចអាន៖ នៅ ស៊ីដនី អត់ចាក់វ៉ាក់សាំង គ្មានការងារធ្វើ