សាហាវព្រៃផ្សៃ! ក្រុមតាលីបង់វាយបានទឹកដី ចូលចាប់ស្រីៗតាមផ្ទះ យកទៅបម្រើផ្លូវភេទ

ក្រុមយុទ្ធជនតាលីបង់ បានសម្រុកចូលតាមផ្ទះ ហើយចាប់យកក្មេងស្រី មានខ្លះអាយុត្រឹម១២ឆ្នាំ យកទៅរៀបការនិងបង្ខំពួកគេឲ្យធ្វើជាទាសករផ្លូវភេទ នៅពេលក្រុមនេះ វាយដណ្តើមយកទឹកដីអាហ្វហ្គានីស្ថានជាច្រើន ពីកងកម្លាំងរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេបញ្ជាការក្រុមជីហាដនិយមមួយនេះ បានបញ្ជាឲ្យអាជ្ញាធរក្នុងតំបន់ដែលពួកគេវាយយកបាន ត្រូវរៀបចំបញ្ជីឈ្មោះស្ត្រីមិនទាន់រៀបការ មានអាយុចាប់ពី ១២ ដល់ ៤៥ ឆ្នាំទៅឲ្យទាហានរបស់ពួកគេ ដើម្បីយករៀបការ ព្រោះពួកសកម្មប្រយុទ្ធចាត់ទុកស្រីៗទាំងនោះថាជា “រង្វាន់នៃសង្គ្រាម”។

បន្ទាប់មក ក្រុមអ្នកប្រយុទ្ធបានសម្រុកចូលពីផ្ទះមួយទៅផ្ទះមួយ ដើម្បីយករង្វាន់របស់ពួកគេ ថែមទាំងរកមើលសំបុត្រស្នាមនានារបស់គ្រួសារផងដែរ ដើម្បីដឹងពីអាយុក្មេងស្រី មុននឹងបង្ខំពួកគេឲ្យចូលទៅក្នុងជីវិតបម្រើផ្លូវភេទ។

ទង្វើដ៏ឃោរឃៅលើស្ត្រីនិងក្មេងស្រីទាំងនេះ គឺជាសញ្ញាចុងក្រោយនៃការដួលរលំរបស់យោធា អាហ្វហ្គានីស្ថាន ដែលបានជំរុញឲ្យប្រធានាធិបតីប្រទេសនេះ បណ្តេញមេបញ្ជាការកំពូលរបស់គាត់ ចេញពីតំណែង។

ទន្ទឹមនឹងនេះដែរ អ្នកស្រុកដែលបានភៀសខ្លួនចេញពីទីក្រុង Kunduz ដែលត្រូវក្រុមតាលីបង់វាយដណ្តើមយកបានកាលពីសប្តាហ៍មុន បានរៀបរាប់អំពីការវាយប្រហារសងសឹក ដែលធ្វើឡើងដោយក្រុមយុទ្ធជនជីហាដ។ ពួកគេបានតាមប្រមាញ់អ្នកណាដែលជាប់ពាក់ព័ន្ធនឹងរដ្ឋាភិបាល ហើយកាត់ក្បាលឬប្រហារជីវិតពួកគេ។

បច្ចុប្បន្ន ក្រុមតាលីបង់បានដណ្តើមយកទីក្រុងចំនួន៩ ក្នុងចំណោមក្រុងទាំង ៣៤ របស់អាហ្វហ្គានីស្ថាន ហើយបានដាក់ទីក្រុងធំ ៗ ភាគច្រើនរបស់ប្រទេសនេះ ស្ថិតនៅក្រោមការឡោមព័ទ្ធ ក្នុងការវាយប្រហារលឿនដូចផ្លេកបន្ទោរ ដែលកម្លាំងរដ្ឋាភិបាលមិនអាចទប់ទល់បាន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អាមេរិក ចេញពីមូលដ្ឋានយោធា អាហ្វហ្គានីស្ថាន ទាំងយប់ដោយមិនបានប្រាប់មេបញ្ជាការថ្មីមួយម៉ាត់