វ៉ាក់សាំង Pfizer ទំនងបង្កហានិភ័យរលាកសាច់ដុំបេះដូងចំពោះក្មេងប្រុសជំទង់

ប្រភពពី  Daily Mail បានឱ្យដឹងថា វ៉ាក់សាំងបង្ការកូវីដ-១៩ របស់ក្រុមហ៊ុន Pfizer អាចបង្កហានិភ័យរលាកបេះដូងចំពោះក្មេងប្រុសជំទង់ ជាពិសេសវ័យ ១៦-១៧ ឆ្នាំ។

ការសិក្សាស្រាវជ្រាវថ្មីមួយបានបង្ហាញថា ពួកជំទង់ប្រុសៗអាយុចន្លោះពី ១៦-១៧ ឆ្នាំងាយប្រឈមនឹងជំងឺរលាកសាច់ដុំបេះដូងដ៏កម្ររហូតដល់ ១៤ដង បើប្រៀបធៀបទៅនឹងក្មេងដទៃដែលចាក់វ៉ាក់សាំងដូចគ្នា។

ទិន្នន័យប្រមូលពីសហរដ្ឋអាមេរិកដែលបានចាក់វ៉ាក់សាំងជូនកុមារក្រោម ១៨ឆ្នាំ បានបង្ហាញថា ក្មេងប្រុសជំទង់មានហានិភ័យខ្ពស់ជាមួយវ៉ាក់សាំង​ Pfizer ក្រោយពេលចាក់បានពីរបីថ្ងៃ។

ការស្រាវជ្រាវដែលបោះពុម្ពផ្សាយនៅក្នុងទស្សនាវដ្ដី JAMA Cardiology បានឱ្យដឹងថា ពួកជំទង់ ១៥ នាក់កើតជំងឺរលាកសាច់ដុំបេះដូង បន្ទាប់ពីទទួលចាក់វ៉ាក់សាំង Pfizer ក្នុងនោះមានក្មេងស្រីតែម្នាក់ប៉ុណ្ណោះ។

ក្មេងទាំង ១៥ បានរងការរំខានសុខភាពដោយពួកគេចាប់ផ្ដើមឈឺទ្រូងបន្ទាប់ពីចាក់វ៉ាក់សាំងរួចពីរបីថ្ងៃ ហើយវាបន្តឈឺរហូតដល់ ៩ ថ្ងៃ។ យ៉ាងណាមិញ គ្មានក្មេងណាម្នាក់រងជំងឺរលាកសាច់ដុំបេះដូងធ្ងន់ធ្ងរ ឬត្រូវបញ្ជូនទៅសង្គ្រោះបន្ទាន់នោះទេ។ ក្នុងរយៈពេលពីរសប្តាហ៍ក្រោយ កុមារភាគច្រើនក៏លែងមានរោគសញ្ញារលាកតទៅទៀត។

សរុបមកការស្រាវជ្រាវបានបង្ហាញថា ការរលាកក្រោយចាក់វ៉ាក់សាំងមានផលប៉ះពាល់ខ្លាំងចំពោះក្មេងប្រុសជំទង់ ប៉ុន្តែទោះជាយ៉ាងនេះក្ដី ហានិភ័យជំងឺបេះដូងមានទាបជាងការឆ្លងវីរុសកូវីដ-១៩ ប្រសិនក្មេងៗមិនទទួលការចាក់វ៉ាក់សាំងនោះទេ៕

ប្រែសម្រួល៖ សន្យា

​ចុចអាន៖ ​ក្រោយធ្វើតេស្តមនុស្ស ២ ក្រុម វ៉ាក់សាំង Pfizer ដូសទី ៣ បង្ហាញប្រសិទ្ធភាពខ្លាំងក្លាការពារវីរុសបំប្លែងខ្លួន Delta

ចុចអាន៖ អ៉ីស្រាអែល​រក​ឃើញ​វ៉ាក់សាំង Pfizer​ ដូស​ទី​៣​មាន​ផល​រំខានប្រហែល​នឹង​ដូស​ទី២