ព័ត៌មានអន្ដរជាតិ

ឥឡូវ អ៉ីស្រាអែលចាប់ចាក់ដូសទី៣ដល់មនុស្សអាយុ៥០ឆ្នាំ ក្រោយចាក់អាយុ៦០ឆ្នាំ

បានផុស

៣ years មុន

នៅ

ថ្ងៃសុក្រ ១៣ សីហា ២០២១

ដោយ

ក្រសួងសុខាភិបាលប្រទេសអ៉ីស្រាអែលបានចេញសេចក្តីណែនាំកាលពីថ្ងៃព្រហស្បតិ៍ ទី១២ ខែសីហាឲ្យចាក់វ៉ាក់សាំងបង្ការកូវីដ-១៩ដូសជំរុញ ឬដូសទី៣ដល់មនុស្សអាយុ៥០ទៅ៥៩ឆ្នាំដើម្បីទប់ស្កាត់ការកើនឡើងវីរុសកាចសាហាវ Delta កំពុងរាតត្បាតខ្លាំង។

អនុសាសន៍របស់ក្រុមទីប្រឹក្សារបស់ក្រសួងសុខាភិបាលដែលបានធ្វើឡើងក្រោយមានការអំពាវនាវរបស់លោកនាយករដ្ឋមន្ត្រី Naftali Bennett ឲ្យពង្រីកការចាក់បន្ថែមដូសទី៣ដល់ប្រជាជនអ៉ីស្រាអែលនៅមិនទាន់ទទួលបានការអនុម័តពីអគ្គនាយករបស់ក្រសួងសុខាភិបាលឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្តែយ៉ាងហោចណាស់ អ្នកផ្តល់សេវាកម្មសុខភាពធំពីរបាននិយាយថា កាលពីថ្ងៃសុក្រ ពួកគេបានចាប់ផ្តើមរៀបចំកាលវិភាគណាត់ប្រជាជនដែលមានអាយុ៥០ទៅ៥៩ឆ្នាំដើម្បីចាក់ដូសទី៣នៃវ៉ាក់សាំង Pfizer-BioNTech ហើយ។

បន្ទាប់ពីយុទ្ធនាការណ៍ចាក់វ៉ាក់សាំងបានជោគជ័យកាលពីចុងឆ្នាំ២០២០ដែលប្រហែលជា៦០%នៃប្រជាជនបានចាក់វ៉ាក់សាំង Pfizer ពីរដូសរួចរាល់ហើយ ករណីឆ្លងកូវីដ-១៩ថ្មីបានធ្លាក់ចុះពីចំនួន ១០ ០០០ នាក់កាលពីខែមករា មកត្រឹមតែមួយខ្ទង់ប៉ុណ្ណោះក្នុងខែមិថុនា។

ទោះជាយ៉ាងណា ការរាលដាលវីរុសកាចសាហាវ Delta យ៉ាងខ្លាំងទូទាំងពិភពលោក ករណីឆ្លងថ្មីនៅប្រទេសអ៉ីស្រាអែលកើនឡើងដល់ ៥៩៤៦នាក់កាលពីថ្ងៃចន្ទដើមសប្តាហ៍នេះ និងអ្នកជំងឺធ្ងន់ធ្ងរក៏កើនឡើងច្រើនដែរ។

ប្រទេសអ៉ីស្រាអែលបានចាប់ផ្តើមចាក់ដូសបន្ថែមដល់ប្រជាជនអាយុ៦០ឆ្នាំបានមួយសប្តាហ៍កន្លងទៅហើយ ដែលបានធ្វើឲ្យអ៉ីស្រាអែលក្លាយជាកន្លែងសាកល្បងសម្រាប់ដូសទី៣មុនពេលទទួលបានការអនុម័តពីរដ្ឋបាលចំណីអាហារ និងឱសថអាមេរិក។ ប្រជាជនអាយុ៦០ឆ្នាំជាង៧០០ ០០០នាក់នៅអ៉ីស្រាអែលបានចាក់ដូសទី៣។

លោកនាយកដ្ឋមន្ត្រី Bennett មានប្រសាសន៍ក្នុងសេចក្តីប្រកាសកាលពីយប់ថ្ងៃព្រហស្បតិ៍ថា ៖«ខ្ញុំសូមសរសើរក្រុមអ្នកជំនាញលើការព្យាបាលកូវីដ-១៩សម្រាប់ការសម្រេចចិត្តដ៏ត្រឹមត្រូវចំពោះសុខភាពប្រជាពលរដ្ឋអ៉ីស្រាអែល។ ខ្ញុំសូមអំពាវនាវដល់ប្រជាជនដែលមានអាយុ៥០ឆ្នាំឡើងទៅតម្រង់ជួរគ្នាព្រឹកស្អែក។ ទៅទទួលវ៉ាក់សាំង»។

ការសិក្សាពីដំបូងបង្ហាញថា មនុស្សភាគច្រើនបំផុតដែលបានចាក់ដូសទី៣មានអាការរំខានប្រហាក់ប្រហែល ឬតិចជាងផលរំខានដូសទី២ដែលពួកគេបានផង៕

ប្រែសម្រួល៖ វីរបុត្រ
ប្រភព៖ Reuters