គុយបា ផលិតវ៉ាក់សាំងខ្លួនឯង ជាពិសេសអាចប្រឆាំង Delta បាន

ស្របពេលកំពុងប្រឈមមុខនឹងការផ្ទុះឡើងយ៉ាងធ្ងន់ធ្ងរនៃជំងឺកូវីដ-១៩ ដែលជំរុញដោយវីរុសបំប្លែងខ្លួន Delta, ប្រទេសគុយបាបាននិយាយថា មានតែ២១,០០០នាក់ ឬ ០,៨ភាគរយប៉ុណ្ណោះនៃប្រជាជន២.៥លាននាក់ បានធ្លាក់ខ្លួនឈឺដោយសារជំងឺនេះ បន្ទាប់ពីទទួលបានវ៉ាក់សាំងផលិតក្នុងស្រុករបស់ខ្លួន។

សាជីវកម្មជីវឱសថរដ្ឋ BioCubaFarma បាននិយាយកាលពីល្ងាចថ្ងៃព្រហស្បតិ៍ថា នេះគឺជាសញ្ញាលើកទឹកចិត្តមួយដែលថា វ៉ាក់សាំងកំពុងដំណើរការ រួមទាំងប្រឆាំងនឹងវីរុសបំប្លែងខ្លួន Delta ផងដែរ ជាពិសេសការពារការធ្លាក់ខ្លួនឈឺធ្ងន់។

ប្រធានក្រុមហ៊ុន BioCubaFarma លោក Eduardo Martinez បាននិយាយនៅលើកញ្ចក់ទូរទស្សន៍រដ្ឋថា“ នេះពិតជាទិន្នន័យដ៏ជោគជ័យ”។ លោកបន្ថែមថា សាជីវកម្មនេះ កំពុងដំណើរការផលិតវ៉ាក់សាំង ដើម្បីចាក់ជូនប្រជាជនទាំងមូលឲ្យបានត្រឹមខែកញ្ញា។

រដ្ឋកោះដែលមានប្រជាជនចំនួន ១១ លាននាក់មួយនេះ កំពុងប្រឹងប្រែងដើម្បីការពារប្រជាជនរបស់ខ្លួនយ៉ាងពេញទំហឹង ខណៈខ្លួនប្រយុទ្ធប្រឆាំងនឹងករណីឆ្លងកូវីដខ្ពស់បំផុតមួយរបស់ពិភពលោក ដោយមួយថ្ងៃ មានការឆ្លងជាង ៨,០០០ ករណី ក្នុងរយៈពេលពីរសប្តាហ៍ចុងក្រោយនេះ។

អាជ្ញាធរ បានចាប់ផ្តើមយុទ្ធនាការចាក់ថ្នាំបង្ការដ៏ធំមួយក្នុងទីក្រុង Havana កាលពីខែឧសភាជាមួយវ៉ាក់សាំង Abdala និង Soberana 2 ដែលពួកគេនិយាយថា មានប្រសិទ្ធភាពជាង ៩០ភាគរយ ក្នុងការសាកល្បងគ្លីនិកដំណាក់កាលចុងក្រោយ បើទោះបីជាទិន្នន័យមិនទាន់ត្រូវបានបោះពុម្ពផ្សាយជាផ្លូវការក៏ដោយ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ រកឃើញរោគសញ្ញាបន្ថែម កើនដល់ ២១ កើតឡើងលើអ្នកចាក់វ៉ាក់សាំង២ដូស ហើយឆ្លងកូវីដ