កុមារសម្រាលក្នុងអំឡុងនៃជំងឺរាតត្បាតកូវីដ-១៩ មានកម្រិត IQ ធ្លាក់ចុះ

ការសិក្សាមួយបានអះអាងថា ទារកដែលសម្រាលក្នុងអំឡុងនៃជំងឺរាតត្បាត មានកម្រិត IQ ធ្លាក់ចុះ ទាបជាងទារកដែលសម្រាលមុនពេលរីរុសកូវីដ-១៩លេចឡើង។

អ្នកស្រាវជ្រាវមកពីសាកលវិទ្យាល័យ Brown នៅលើរដ្ឋ Rhode Island សហរដ្ឋអាមេរិក បានរកឃើញថា ទារកចាប់កំណើតអំឡុងខែមីនា រហូតខែកក្កដា ឆ្នាំ ២០២០ មានសមត្ថភាពយល់ដឹង ការប្រើពាក្យសំដី និងសកម្មភាពរាងកាយចុះខ្សោយ តិចជាងកុមារដែលប្រសូតមុនពេលមានវីរុសកូវីដ-១៩។

IQ ជាមធ្យមរបស់កុមារអាយុពី ៣ ខែដល់ ៣ ឆ្នាំបានធ្លាក់ចុះពី ១០០ មកត្រឹមតែ ៧៩ ពិន្ទុប៉ុណ្ណោះ ក្នុងកំឡុងពេលនេះ។ អ្នកវិទ្យាសាស្ត្របញ្ជាក់បន្ថែមថា ករណីនេះកាន់តែជះផលអវិជ្ជមានចំពោះក្មេងប្រុស និងកុមារមកពីគ្រួសារក្រីក្រ។

ការស្រាវជ្រាវបានសិក្សាទៅលើកុមារចំនួន ៦៧២ នាក់នៅ Rhode Island ដោយតេស្តកុមារលើការនិយាយស្ដី និងមូលដ្ឋាននៃការរៀនដំបូង ដើម្បីវាយតម្លៃការអភិវឌ្ឍរបស់ពួកគេ។

អ្នកវិទ្យាសាស្ត្ររកឃើញថា IQ របស់កុមារដែលមានជីវភាពក្រីក្របានធ្លាក់ចុះគួរឱ្យកត់សម្គាល់ ដែលមូលហេតុដោយសារកង្វះការថែទាំផង និងដោយសារបិទខ្ទប់ផង។ ដោយឡែកការបិទខ្ទប់ ពិតជាប៉ះពាល់ដល់ការលូតលាស់ផ្នែកបញ្ញាសា្មរតីរបស់កុមារ ព្រោះថាកំលុងពេលនេះ  កុមារអាក់ខានសកម្មភាពរាងកាយ ការហ្វឹលហាត់ខួរក្បាល និងបាត់បង់ទំនាក់ទំនងសង្គម។

វេជ្ជបណ្ឌិត Sean Deoni ជាអ្នកដឹកនាំការសិក្សាថ្លែងប្រាប់កាសែត The Guardian ថា ការធ្លាក់ចុះនៃពិន្ទុ IQ ពិតជាចាំបាច់ណាស់ចំពោះការលូតលាស់របស់កុមារ ជាពិសេសវាបង្កផលប៉ះពាល់ទៅលើការយល់ដឹងសំខាន់ៗរបស់ពួកគេ។

លទ្ធផលសិក្សាបង្ហាញថា វត្តមាននៃមេរោគ SARS-CoV-2 បង្កផលអវិជ្ជមានដល់ការអភិវឌ្ឍលើទារកនិងកុមារ ដោយវាបណ្តាលឱ្យមានការធ្លាក់ចុះនៃភាពវៃឆ្លាតចំពោះក្មេងៗ។ ក្រៅពីនោះ វាអាចបង្កឱ្យកុមារមានអារម្មណ៍ភ័យខ្លាច និងអាចមានផលប៉ះពាល់ដល់ការយល់ដឹងរយៈពេលវែង ព្រមទាំងបង្កជាជំងឺដាច់សរសៃឈាមខួរក្បាល ឬខ្សោយអង្គចងចាំផងដែរ៕

ប្រែសម្រួល៖ សន្យា

ប្រភព៖​ Daily Mail

ចុចអាន៖ ប្រយ័ត្នឲ្យមែនទែន! កុមារកំពុងជាមុខសញ្ញាធំនៃវីរុសបំប្លែងខ្លួន Delta

ចុចអាន៖ អ្នកជំនាញ៖ ចំពោះស្ត្រីឆ្លងកូវីដក្នុងអំឡុងពេលមានផ្ទៃពោះ អាចប្រឈមនឹងកើតកូនមិនគ្រប់ខែឬឈានដល់ស្លាប់