ព័ត៌មានអន្ដរជាតិ

ហ្វីលីពីន ប្រកាសរកឃើញវីរុសបំប្លែងខ្លួនដែលងាយឆ្លង និងធន់វ៉ាក់សាំង

បានផុស

៣ years មុន

នៅ

ថ្ងៃចន្ទ ១៦ សីហា ២០២១

ដោយ

អាជ្ញាធរសុខាភិបាលហ្វីលីពីនកាលពីថ្ងៃអាទិត្យបាននិយាយថា ពួកគេបានរកឃើញករណីដំបូងនៃវីរុសបំប្លែងខ្លួន Lambda ដែលងាយឆ្លង និងធន់នឹងវ៉ាក់សាំង ។

ទន្ទឹមនោះ ក្រសួងសុខាភិបាល (DoH) បាននិយាយនៅក្នុងសេចក្តីថ្លែងការណ៍មួយថា អ្នកជំងឺគឺជាស្ត្រីអាយុ ៣៥ ឆ្នាំ ហើយមិនបានបង្ហាញរោគសញ្ញាណាមួយឡើយ ចាប់តាំងពីបានជាសះស្បើយជំងឺកូវីដ ១៩ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយទៀតថា ទីភ្នាក់ងារសុខភាពកំពុងតាមដានអ្នកដែលមានទំនាក់ទំនងជិតស្និទ្ធ ជាមួយអ្នកជំងឺដែលបានជាសះស្បើយ បន្ទាប់ពីត្រូវបានដាក់ឲ្យធ្វើចត្តាឡីស័ករយៈពេល ១០ ថ្ងៃ ។

យោងតាមការសិក្សាស្រាវជ្រាវបានឲ្យដឹងថា “Lambda គឺជាវីរុសបំប្លែងខ្លួនមកពីជំងឺកូវីដ ១៩ ។ វាត្រូវបានគេរកឃើញជាលើកដំបូងនៅក្នុងប្រទេសប៉េរូនៅក្នុងខែធ្នូ ។ វីរុសនេះមានសមត្ថភាពឆ្លងលឿនជាងមេរោគដើម ដែលមកពីទីក្រុងអ៊ូហាន ប្រទេសចិន ហើយវាក៏មានភាពធន់នឹងវ៉ាក់សាំងផងដែរ ខណៈ WHO ចាត់ទុកវីរុសបំប្លែងខ្លួន Lambda ជា វីរុសគួរឲ្យចាប់អារម្មណ៍” ។

ស្របពេលជាមួយគ្នានេះ DoH ក៏បានរាយការណ៍ពីការឆ្លងថ្មីនៃជំងឺកូវីដ ១៩ ចំនួន ១៤,៧៤៩ ករណី, វីរុសបំប្លែងខ្លួនឥណ្ឌា Delta ចំនួន ១៨២ ករណី, វីរុសអង់គ្លេស Alpha ៤១ ករណី, វីរុសអាហ្វ្រិកខាងត្បូង Beta ៦៦ ករណី និងវីរុសហ្វីលីពីនខ្លួនឯងឈ្មោះ P.3 ចំនួន ៤០ ករណី ។

គួរបញ្ជាក់ថា គិតត្រឹមពេលនេះ ប្រទេសហ្វីលីពីនបានកត់ត្រាករណីឆ្លងជំងឺកូវីដ ១៩ សរុបចំនួន ១.៧៤ លានករណី និងអ្នកស្លាប់ ៣០,៣៤០ នាក់, វីរុស Delta ចំនួន ៨០៧ ករណី, វីរុស Alpha ២,២៣២ ករណី, វីរុស Beta ២,៤៨៣ ករណី និងវីរុស P.3 ចំនួន ៣៤៧ ករណី ៕