ព័ត៌មានអន្ដរជាតិ

ខ្វះវ៉ាក់សាំងពេក ថៃទៅខ្ចីវ៉ាក់សាំងពីប្រទេសតូចប៊ូតាន

បានផុស

៣ years មុន

នៅ

ថ្ងៃអង្គារ ១៧ សីហា ២០២១

ដោយ

ប្រទេសថៃដែលជាកន្លែងផលិតវ៉ាក់សាំងបង្ការកូវីដ-១៩ AstraZeneca នៅក្នុងតំបន់មួយបានកំពុងស្វះស្វែងរកខ្ចីវ៉ាក់សាំងប្រភេទដូចគ្នានេះចំនួន ១៥០ ០០០ដូសពីប្រទេសប៊ូតាន ស្របពេលការផ្គត់ផ្គង់ក្នុងប្រទេសកំពុងខ្វះខាតខ្លាំង។ នេះបើតាមការឲ្យដឹងពីមន្ត្រីម្នាក់បាននិយាយនៅថ្ងៃចន្ទ ទី១៦ ខែសីហា។

ថៃបានកំពុងប្រឈមការនឹងការលំបាកសម្រាប់ការចាក់ដូសជំរុញសម្រាប់វ៉ាក់សាំងដែលមាននៅក្នុងស្តុករបស់ខ្លួន បន្ទាប់វិបត្តិកូវីដ-១៩វាយប្រហារយ៉ាងធ្ងន់ធ្ងរបំផុតពោលគឺយុទ្ធនាការណ៍ចាក់វ៉ាក់សាំងទ្រង់ទ្រាយធំទើបបានពីរខែប៉ុណ្ណោះដែលបានចាប់ផ្តើមកាលពីខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំខ្ចីវ៉ាក់សាំងពីប៊ូតានដែលជាព្រះរាជាណាចក្រមានប្រជាជនមិនដល់១លាននាក់ផងនោះឆ្លុះបញ្ចាំងឲ្យឃើញពីកិច្ចខិតខំប្រឹងប្រែងដើម្បីបំពេញវ៉ាក់សាំងដែលខ្វះខាត បន្ទាប់ពីក្រុមហ៊ុនវ៉ាក់សាំង AstraZeneca ក្នុងប្រទេសបានឲ្យដឹងថា ពួកគេអាចផ្គត់ផ្គង់ក្នុងប្រទេសថៃបានប្រមាណ៥ទៅ៦លានដូសប៉ុណ្ណោះក្នុងមួយៗខែ ដូច្នេះចំនួននេះបានត្រឹមពាក់កណ្តាលនៃគោលដៅរបស់រដ្ឋាភិបាល។

ប្រទេសថៃផលិតវ៉ាក់សាំង AstraZeneca សម្រាប់ការផ្គត់ផ្គង់ក្នុងតំបន់ ប៉ុន្តែរហូតដល់ពេលនេះទើបចាក់ពេញលេញដល់ប្រជាជនរបស់ខ្លួនបានប្រមាណ៧.១% ហើយគ្រោងនឹងបង្កើនចំនួនចាក់ឲ្យបានទ្វេដងនៅខែខាងមុខ។

ផ្ទុយទៅវិញ ប្រទេសប៊ូតានបានចាប់ផ្តើមចាក់វ៉ាក់សាំងដល់ប្រជាជនរបស់ខ្លួនតាំងពីខែមីនា និងចាក់បានជាង១លានដូសហើយដែលចំនួននេះគឺគ្រប់គ្រាន់សម្រាប់ប្រជាជនរបស់ខ្លួន២ភាគ៣។ ប្រទេសតូចមួយនេះមានករណីឆ្លងកូវីដ-១៩តិចជាង៣០០នាក់ និងស្លាប់តែ៣នាក់ប៉ុណ្ណោះ។

លោក Natapanu Nopakun អ្នកនាំពាក្យក្រសួងការបរទេសបាននិយាយថា ៖«ការរៀបចំផ្លាស់ប្តូរវ៉ាក់សាំងរវាងប៊ូតាន និងថៃ…គឺផ្អែកលើមូលដ្ឋាន ថៃនឹងបញ្ជូនវ៉ាក់សាំងទៅឲ្យប្រទេសប៊ូតានវិញនៅពេលក្រោយ។

«នៅពេលនេះ កិច្ចព្រមព្រៀងកំពុងត្រូវបានពិនិត្យមើល និងត្រូវបានពិចារណាដោយរដ្ឋាភិបាល»។ លោក Natapanu Nopakun បានបញ្ជាក់។

កាលពីថ្ងៃចន្ទម្សិលមិញនេះ ប្រទេសថៃមានករណីឆ្លងកូវីដ-១៩ថ្មីចំនួន ២១ ១៥៧នាក់ដែលធ្វើឲ្យតួលេខឆ្លងសរុបឡើងដល់ ៩២៨ ៣១៤នាក់ និងស្លាប់ថ្មី១៨២នាក់ដែលសរុបអ្នកស្លាប់ឡើងដល់៧៧៣៤នាក់៕

ប្រែសម្រួល៖ វីរបុត្រ
ប្រភព៖ Reuters