ព្រលានយន្តហោះក្រុង កាប៊ុល បើកឡើងវិញ ចំពេលមានការព្រួយបារម្ភថា ក្រុម ISIS ចូលបង្កប់ខ្លួន វាយប្រហារភេរវកម្ម

ក្រុមមន្រ្តីអាមេរិកបានប្តេជ្ញាថា ព្រលានយន្តហោះក្រុងកាប៊ុល នឹងបើកដំណើរការឡើងវិញនៅថ្ងៃអង្គារនេះ ខណៈសន្តិសុខត្រូវបានរឹតបន្តឹងបន្ថែម ដើម្បីគ្រប់គ្រងការជម្លៀសជបរទេសនិងជនជាតិអាហ្វហ្គានីស្ថាន ដែលកំពុងព្យាយាមរត់គេចពីការគ្រប់គ្រងរបស់ក្រុមតាលីបង់ ចំពេលមានការភ័យខ្លាចកាន់តែខ្លាំងឡើងថា ក្រុមរដ្ឋឥស្លាមអាចប្រព្រឹត្តអំពើឃោរឃៅនៅក្នុងប្រទេសនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចូ បៃដិន បាននិយាយការពារការដកទ័ពអាមេរិកចេញពីអាហ្វហ្គានីស្ថាន ហើយបានស្តីបន្ទោសលោក ដូណាល់ ត្រាំ និងសេវាកម្មសន្តិសុខអាហ្វហ្គានីស្ថានចំពោះភាពអនាធិបតេយ្យដែលបានលេបត្របាក់ប្រទេសនេះ។

ថ្លែងពីសេតវិមាន លោកប្រធានាធិបតី បានប្រាប់ប្រជាជាតិអាមេរិកថា ការវាយលុកដ៏គួរឲ្យភ្ញាក់ផ្អើលរបស់ក្រុមតាលីបង់ដើម្បីដណ្តើមអំណាចនិងរឹបអូសយករដ្ឋធានីកាប៊ុលនៅខែនេះ គឺបានកើតឡើងលឿនជាងលោក រំពឹងទុកទៅទៀត។

សុន្ទរកថារបស់លោកបានកើតឡើង នៅពេលពិភពលោកមានការភ្ញាក់ឡើងចំពោះរូបភាពពលរដ្ឋអាហ្វហ្គានីស្ថាន ធ្លាក់ពីយន្តហោះធុន C-17 របស់កងទ័ពអាកាសអាមេរិកនៅខាងលើអាកាសយានដ្ឋានអន្តរជាតិ Hamid Karzai ខណៈប្រជាជនរាប់រយនាក់ផ្សេងទៀត ព្យាយាមរត់គេចពីរបបដឹកនាំដោយក្រុមតាលីបង់។

អាកាសយានដ្ឋាននេះ ត្រូវបង្ខំចិត្តបិទ ហើយជើងហោះហើរជម្លៀសត្រូវបានបញ្ឈប់បន្ទាប់ពីមនុស្សយ៉ាងតិច ៨ នាក់បានស្លាប់ ក្នុងនោះមាន ២នាក់ត្រូវបានបាញ់ដោយទាហានអាមេរិក, ពីរនាក់ត្រូវយន្តហោះកិនហើយបីនាក់ត្រូវគេរត់ជាន់។

ប៉ុន្តែនៅក្នុងការជំរុញឲ្យមានសន្តិសុខដល់ព្រលានយន្តហោះ, ប្រទេសអង់គ្លេសបានដាក់ពង្រាយទាហានបន្ថែម ២០០ នាក់ចំណែក អាមេរិក ដាក់ពង្រាយ ១,០០០ នាក់កាលពីថ្ងៃចន្ទ។ ទាហានដាក់ពង្រាយនេះ ត្រូវបានគេរំពឹងថានឹង ល្បាតដើម្បីជួយរក្សាព្រលានយន្តហោះក្នុងរដ្ឋធានីឲ្យមានសុវត្ថិភាព។

អង់គ្លេស និង អាមេរិកក៏កំពុងព្រួយបារម្ភខ្លាំងផងដែរថា ពួកឥស្លាមនិយម ISIS អាចកេងប្រវ័ញ្ចពីភាពខ្វះចន្លោះសន្តិសុខនៅអាកាសយានដ្ឋាន ដោយចូលបង្កប់ខ្លួន ធ្វើការបំផ្ទុះគ្រាប់បែកអត្តឃាត៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប្រធានាធិបតីអាហ្វហ្គានីស្ថាន វេចលុយមួយឧទ្ធម្ភាគចក្រ និងរថយន្ត៤គ្រឿង ពេលរត់ចេញពីប្រទេស