ពលរដ្ឋ អាហ្វហ្គានីស្ថាន ជាពិសេសស្រីៗ ព្រួយបារម្ភអំពីអនាគតប្រទេស បន្ទាប់ពីការគ្រប់គ្រងរបស់ តាលីបង់

ស្ថានភាពរបស់ប្រជាជននៅទីក្រុងកាប៊ុលបានផ្លាស់ប្តូរ បន្ទាប់ពីក្រុមតាលីបង់បានគ្រប់គ្រងប្រទេសទាំងមូល ។ អ្នកខ្លះហាក់ដូចជាខ្លាចចលនាដែលដណ្តើមការគ្រប់គ្រងលើការដឹកនាំប្រទេស ជាពិសេសធ្វើឲ្យស្ថានភាពសេដ្ឋកិច្ចក្រីក្ររបស់អាហ្វហ្គានីស្ថាន ក៏ដូចជាខ្វះមន្ទីរពេទ្យ និងថ្នាំពេទ្យជាដើម ។

ប្រជាជនបានសម្តែងបំណងចង់ចាកចេញពីប្រទេសអាហ្វហ្គានីស្ថាន ព្រោះពួកគេខ្លាចប្រតិកម្មរបស់ពួកសកម្មប្រយុទ្ធតាលីបង់ ដោយសារប្រទេសនេះលែងមានសុវត្ថិភាពហើយ ។

ពួកគេបានជំរុញឲ្យមានវិធីដែលអាចធ្វើបានដើម្បីរត់គេចខ្លួននៅក្រៅប្រទេស ជាពិសេសគ្រួសារដែលមានក្មេងស្រី ព្រោះមនុស្សជាច្រើនប្រឈមមុខនឹងការតស៊ូដ៏លំបាកដើម្បីបន្តជីវិតរបស់ពួកគេនៅអាហ្វហ្គានីស្ថាន ។

នៅក្នុងបទសម្ភាសន៍មួយជាមួយទីភ្នាក់ងារព័ត៌មាន A24 ប្រជាពលរដ្ឋអាហ្វហ្គានីស្ថានម្នាក់បាននិយាយថា “សូមធ្វើឲ្យងាយស្រួលសម្រាប់ខ្ញុំក្នុងការចាកចេញពីអាហ្វហ្គានីស្ថាន ។ ខ្ញុំមានកូន ១១ នាក់ ហើយភាគច្រើនជាក្មេងស្រី តើពួកគេនឹងរស់នៅទីនេះយ៉ាងដូចម្តេច ។ យើងមិនមានអ្វីហូបទេ សមាជិកគ្រួសាររបស់ខ្ញុំឈឺគ្មានមន្ទីរពេទ្យសម្រាប់អ្នកជំងឺទេ” ។

បុរសខាងលើបន្តថា “ខ្ញុំបានទៅអាកាសយានដ្ឋានទីក្រុងកាប៊ុលដើម្បីចាកចេញពីអាហ្វហ្គានីស្ថានជាមួយគ្រួសារខ្ញុំ ប៉ុន្តែជាអកុសលពួកគេមិនបានផ្តល់ការអនុញ្ញាតឲ្យយើងចាកចេញទេ ។ អាហ្វហ្គានីស្ថានមិនមែនជាប្រទេសមានសុវត្ថិភាពក្នុងការរស់នៅនោះទេ ដោយសារតែក្រុមតាលីបង់” ។

ពលរដ្ឋអាហ្វហ្គានីស្ថានបញ្ជាក់ថា “យើងច្រលំនៅពេលយើងឃើញតាលីបង់នៅក្រុងកាប៊ុល មនុស្សទាំងអស់ភ័យខ្លាច ជាពិសេសអ្នកជំនួញ ការថែទាំសុខភាព សាលារៀន និងធនាគារទាំងអស់ត្រូវបានបិទ ។ យើងកំពុងប្រឈមនឹងបញ្ហាធំមួយដើម្បីបន្តជីវិតរបស់យើងនៅអាហ្វហ្គានីស្ថាន” ។

ជាចុងក្រោយបុរសនោះប្រាប់ថា “ខ្ញុំមិនយល់ថាហេតុអ្វីបានជារដ្ឋាភិបាលអាហ្វហ្គានីស្ថានត្រូវបានប្រគល់ឲ្យតាលីបង់នោះទេ ប៉ុន្តែតាលីបង់មើលទៅល្អជាងមុន ។ យើងសង្ឃឹមថានឹងមានការផ្លាស់ប្តូរពិតប្រាកដ និងរយៈពេលវែងពីពួកតាលីបង់” ៕

ប្រែសម្រួលដោយ ៖ ជីវ័ន្ត

ប្រភព ៖ A24 News Agency

ចុចអាន ៖ អាមេរិក បង្កកប្រាក់បម្រុងរបស់រដ្ឋាភិបាល អាហ្វហ្គានីស្ថាន ក្នុងធនាគាររបស់ខ្លួន ការពារកុំឲ្យក្រុម តាលីបង់ ប្រើប្រាស់បាន