Joe Biden ៖ “យើងកំពុងធ្វើសង្គ្រាមជាមួយកូវីដ មិនមែនជាមួយអ្នកណាផ្សេងទេ”

មួយថ្ងៃមុនពិធីបុណ្យ Thanksgiving ប្រធានាធិបតីជាប់ឆ្នោតអាមេរិកលោក Joe Biden បានជំរុញឲ្យមានការរួបរួមគ្នាដោយនិយាយថា ជំងឹកូវីដ ១៩ បានបំផ្លាញប្រទេសជាតិក្នុងរយៈពេលជិតមួយឆ្នាំកន្លងមកនេះ ។

ក្នុងអំឡុងពេលថ្លែងសុន្ទរកថានៅក្នុងរដ្ឋ Delaware ជារដ្ឋកំណើតរបស់គាត់ លោក Biden បាននិយាយថា “វីរុសនាំឲ្យយើងឈឺចាប់ បាត់បង់ និងខកចិត្ត ហើយជីវិតជាច្រើនត្រូវបានឆក់យកដោយជំងឺនេះដូចជាខឹងនឹងជនជាតិអាមេរិក” ។

លោកនិយាយថា “ខ្ញុំដឹងថា ប្រទេសនេះមានការធុញទ្រាន់នឹងការប្រយុទ្ធប្រឆាំងជំងឺឆ្លង ប៉ុន្តែយើងត្រូវចាំថា យើងកំពុងធ្វើសង្គ្រាមជាមួយកូវីដ ១៩ មិនមែនជាមួយអ្នកណាផ្សេងទេ” ។ លោកបានអំពាវនាវឲ្យជនជាតិអាមេរិកបង្កើនកិច្ចប្រឹងប្រែងទ្វេដង និងរួបរួមគ្នាដើម្បីប្រយុទ្ធប្រឆាំងនឹងជំងឺកូវីដ ១៩ ។

យោងតាមសាកលវិទ្យាល័យ Johns Hopkin បានឲ្យដឹងថា ជំងឺកូវីដ ១៩ បានសម្លាប់មនុស្សជាង ២៦០,០០០ នាក់នៅសហរដ្ឋអាមេរិកចាប់តាំងពីដើមខែកុម្ភៈ ខណៈមានករណីឆ្លងសរុបចំនួន ១២.៨ លានករណី ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu