WHO ប្រាប់ម្តងទៀត កុំទាន់ចាក់វ៉ាក់សាំងដូសទី៣ រង់ចាំការសិក្សាបន្ថែមសិន

កាលពីថ្ងៃពុធទី១៨ខែសីហា អង្គការសុខភាពពិភពលោក (WHO) បាននិយាយថា ទិន្នន័យបច្ចុប្បន្នមិនបង្ហាញថា ចាំបាច់ត្រូវចាក់វ៉ាក់សាំងកូវីដដូសជំរុញនោះទេ។ WHO បន្ថែមថា មនុស្សដែលងាយរងគ្រោះបំផុតនៅទូទាំងពិភពលោក គួរតែត្រូវបានចាក់វ៉ាក់សាំងឲ្យបានពេញលេញសិន មុនពេលប្រទេសមានប្រាក់ចំណូលខ្ពស់ ចាក់វ៉ាក់សាំងបន្ថែម។

ការអត្ថាធិប្បាយនេះ បានកើតឡើងមុនពេលរដ្ឋាភិបាលអាមេរិកនិយាយថា ខ្លួនគ្រោងនឹងចាក់វ៉ាក់សាំងដូសជំរុញ ដល់ប្រជាជនអាមេរិកទាំងអស់ចាប់ពីថ្ងៃទី ២០ ខែកញ្ញាទៅ ស្របពេលវីរុសកូវីដបំប្លែងខ្លួន Delta កំពុងវាយលុក។

នៅពេលត្រូវបានសាកសួរអំពីតម្រូវការសម្រាប់វ៉ាក់សាំងជំរុញដើម្បីបង្កើនប្រសិទ្ធភាពការពារប្រឆាំងនឹងជំងឺនេះ ប្រធានផ្នែកវិទ្យាសាស្ត្ររបស់ WHO លោកស្រី Soumya Swaminathan បានប្រាប់សន្និសីទសារព័ត៌មានទីក្រុងហ្សឺណែវថា “យើងជឿជាក់យ៉ាងច្បាស់ថា ទិន្នន័យនាពេលសព្វថ្ងៃនេះ មិនបានបង្ហាញថា ចាំបាច់ត្រូវការវ៉ាក់សាំងដូសជំរុញនោះទេ”។ លោកស្រីបន្ថែមថា ការសិក្សាបន្ថែមគឺត្រូវការជាចាំបាច់។

ស្របពេលជាមួយគ្នានោះដែរ ទីប្រឹក្សាជាន់ខ្ពស់របស់ WHO លោក Bruce Aylward បានប្រាប់អ្នកយកព័ត៌មានថា “មានវ៉ាក់សាំងគ្រប់គ្រាន់នៅជុំវិញពិភពលោក ប៉ុន្តែវាមិនត្រូវទៅកន្លែងត្រឹមត្រូវទេ”។ លោកបាននិយាយបែបនេះ ដោយសំដៅទៅលើវ៉ាក់សាំង ដែលកំពុងចាក់នៅក្នុងប្រទេសដែលមានប្រាក់ចំណូលខ្ពស់។

លោកនិយាយថា វ៉ាក់សាំងពីរដូស គួរតែត្រូវបានផ្តល់ទៅឲ្យអ្នកដែលងាយរងគ្រោះបំផុតនៅទូទាំងពិភពលោកជាមុនសិន មុនពេលចាក់ដូសជំរុញដល់អ្នកដែលបានចាក់វ៉ាក់សាំងពេញលេញហើយ៕

ប្រែសម្រួល៖ Vann Vann

ប្រភព៖ CNA

ចុចអាន៖ WHO រកឃើញវ៉ាក់សាំង AstraZeneca របស់ឥណ្ឌា ក្លែងក្លាយ