ស្រ្តីអាហ្វហ្គានីស្ថាន ដឹកនាំបាតុកម្មប្រឆាំងក្រុម តាលីបង់

ស្ត្រីបានដឹកនាំក្រុមបាតុករប្រឆាំងពួកតាលីបង់ នៅក្នុងប្រទេសអាហ្វហ្គានីស្ថាន ខណៈពួកគេគ្រវីទង់ជាតិប្រឆាំងនឹងក្រុមឥស្លាមនិយមនេះ ដើម្បីប្រារព្ធទិវាឯករាជ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាតុករជាស្ត្រី បានដើរនៅតាមដងផ្លូវក្នុងទីក្រុងកាប៊ុល ដោយគ្រវីទង់ជាតិពណ៌ខ្មៅ ក្រហមនិងបៃតង ដែលបានក្លាយជានិមិត្តរូបនៃការប្រឆាំងនឹងមេដឹកនាំជីហាដរបស់ប្រទេស។

ពួកគេត្រូវបានចូលរួមដោយមនុស្សរាប់ពាន់នាក់នៅទូទាំងប្រទេស ដែលបានប្រារព្ធទិវាប្រគល់អំណាចឆ្នាំ១៩១៩ពីអង់គ្លេស។ បាតុកម្មនេះ បានកើតឡើងត្រឹមតែមួយថ្ងៃប៉ុណ្ណោះ បន្ទាប់ពីមនុស្សបីនាក់ត្រូវបានបាញ់សម្លាប់ដោយសារ លើកទង់ជាតិអំឡុងការតវ៉ា។

ក្រុមយុទ្ធជនឥស្លាមនិយមនេះ ក៏បានប្រារព្ធទិវាឯករាជ្យតាមវិធីផ្ទាល់ខ្លួនរបស់ពួកគេផងដែរ ដោយការបង្ហូតទង់ពណ៌ខ្មៅនិងស ហើយអះអាងអំពីជ័យជម្នះលើកងកម្លាំងអាមេរិក។

កាលពីថ្ងៃព្រហស្បតិ៍ ក្បួនរថយន្តនិងមនុស្សនៅជិតព្រលានយន្តហោះទីក្រុងកាប៊ុល បានកាន់បដាពណ៌ខ្មៅ ក្រហមនិងបៃតងដ៏វែងដើម្បីគោរពទង់ជាតិអាហ្វហ្គានីស្ថាន។

ក្រុមអ្នកតវ៉ា ថែមទាំងបានលើកទង់ជាតិនៅទីលាន Abdul Haq ក្នុងរដ្ឋធានីទៀតផង ដើម្បីបង្ហាញពីការតស៊ូដោយភាពក្លាហាន។

នៅឯការតវ៉ាមួយទៀតក្នុងខេត្ត Nangarhar វីដេអូដែលបង្ហោះតាមអ៊ីនធើណិត បានបង្ហាញពីបាតុករមានហូរឈាម ជាមួយស្នាមរបួសគ្រាប់កាំភ្លើង។

នៅខេត្ត Khost អាជ្ញាធរតាលីបង់បានដាក់បំរាមគោចរ ២៤ ម៉ោងកាលពីថ្ងៃព្រហស្បតិ៍ បន្ទាប់ពីបានបំបែកការតវ៉ាមួយទៀតដោយហិង្សា៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ វីដេអូស្តែងៗ ក្រុងតាលីបង់ ចាប់ដាក់ខ្នោះ បិទមុខមេប៉ូលិស មុនពេលបាញ់សម្លាប់