ព័ត៌មានអន្ដរជាតិ

តាលីបង់កំពុងតាមសម្លាប់រង្គាលជនជាតិភាគតិច Hazara

បានផុស

៤ years មុន

នៅ

ថ្ងៃសុក្រ ២០ សីហា ២០២១

ដោយ

ថ្មីៗនេះក្រុមតាលីបង់កំពុងតាមធ្វើទារុណកម្ម និងសម្លាប់រង្គាលសមាជិកជនជាតិភាគតិច Hazara នៅប្រទេសអាហ្វហ្គានីស្ថាន។ នេះបើតាមការឲ្យដឹងពីអង្គការលើកលែងទោសអន្តរជាតិ (Amnesty International)។

សាក្សីបានផ្តល់កំណត់ហេតុនៃការសម្លាប់ដ៏រន្ធត់ដែលបានកើតឡើងកាលពីដើមខែកក្កដាក្នុងខេត្ត Ghazni។

ចាប់តាំងពីកាន់កាប់រដ្ឋធានីកាប៊ុលកាលពីថ្ងៃអាទិត្យ ក្រុមតាលីបង់បានព្យាយាមបង្ហាញរូបភាពរឹតត្បិតជាងមុន។ អង្គការ Amnesty បាននិយាយថា ឧបទ្ទវហេតុគឺជាសញ្ញាដ៏រន្ធត់នៃការគ្រប់គ្រងរបស់តាលីបង់។

សហគមន៍ Hazara ជាក្រុមជនជាតិភាគតិចធំលំដាប់ទី៣នៅអាហ្វហ្គានីស្ថាន។ ពួកគេគោរពសាសនាឥស្លាម Shia Islam និងជាយូរមកហើយដែលប្រឈមនឹងការរើសអើង និងការធ្វើទុក្ខបុកម្នេញនៅអាហ្វហ្គានីស្ថាន និងប៉ាគីស្ថានដែលគោរពសាសនាឥស្លាម Sunni ភាគច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ចេញផ្សាយកាលពីថ្ងៃព្រហស្បតិ៍ម្សិលមិញ អង្គការលើកលែងទោសអន្តរជាតិ Amnesty បាននិយាយថា បុរសជនជាតិ Hazara ៩នាក់ត្រូវបានសម្លាប់ចន្លោះថ្ងៃទី៤ និងទី៦ ខែកក្កដា នៅស្រុក Malistan ភាគខាងកើតខេត្ត Ghazni។

ក្រុមសិទ្ធិមនុស្សអន្តរជាតិនេះបានសម្ភាសសាក្សី និងពិនិត្យមើលភស្តុតាងរូបភាព បន្ទាប់ពីការសម្លាប់។ អ្នកភូមិបាននិយាយថា ពួកគេបានរត់គេចទៅភ្នំនៅពេលមានការប្រយុទ្ធកាន់តែខ្លាំងរវាងកម្លាំងរដ្ឋាភិបាល និងសកម្មប្រយុទ្ធតាលីបង់។

នៅពេលអ្នកខ្លះវិលត្រឡប់ចូលភូមិ Mundarakht ដើម្បីយកស្បៀងអាហារ ពួកគេនិយាយថា ក្រុមតាលីបង់បានពួននៅក្នុងផ្ទះដើម្បីរង់ចាំចាប់ខ្លួន។ បុរសខ្លះដែលឆ្លងកាត់ភូមិទៅផ្ទះក៏ត្រូវបានក្រុមតាលីបង់ពួនស្ទាក់ចាប់តាមផ្លូវ។

បុរស៦នាក់ត្រូវបានរាយការណ៍ពីការបាញ់សម្លាប់ និង៣នាក់ទៀតធ្វើទារុណកម្មរហូតដល់ស្លាប់។

យោងតាមសាក្សីថា បុរសម្នាក់ត្រូវបានរុំក្រណាត់ជិតខ្លួន ហើយកាត់សាច់ដុំដៃចេញ។ ជនរងគ្រោះម្នាក់ទៀតត្រូវបានបាញ់សម្លាប់ជាចំណែកៗ។ សាក្សីឃើញផ្ទាល់ភ្នែកនិយាយថា ពួកគេបានសួរសកម្មប្រយុទ្ធថា ហេតុអ្វីបានជាធ្វើបាបមនុស្សយ៉ាងដូច្នេះ។

សកម្មប្រយុទ្ធម្នាក់និយាយដោយចោទប្រកាន់ថា ៖«ពេលនេះជាពេលជម្លោះ អ្នករាល់គ្នាស្លាប់ វាគ្មានបញ្ហាទេ បើអ្នកមានកាំភ្លើងឬអត់។ វាជាពេលសង្គ្រាម»។

អគ្គលេខាធិការអង្គការ Amnesty លោក Agnès Callamard បាននិយាយថា ៖«ភាពឃោឃៅពេញដោយឈាមនៃការសម្លាប់មនុស្សទាំងនោះគឺជាការរម្លឹកអតីតកាលរបស់តាលីបង់ និងជាសញ្ញាដ៏រន្ធត់ពីអ្វីដែលប្រហែលជាតាលីបង់នាំមកទៀត»។

«ការស្លាប់ដែលជាគោលដៅទាំងនោះគឺជាភស្តុតាងដែលក្រុមជនជាតិភាគតិច និងសាសនាបន្តមានហានិភ័យដ៏អាក្រក់ស្ថិតក្រោមការគ្រប់គ្រងរបស់តាលីបង់នៅអាហ្វហ្គានីស្ថាន»។ លោក Agnès បញ្ជាក់។

បន្ថែមលើនេះទៀត សេវាទូរសព្ទចល័តត្រូវបានកាត់ផ្តាច់ជាច្រើនកន្លែងនៅតាមតំបន់ដែលគ្រប់គ្រងដោយតាលីបង់ ដូច្នេះព័ត៌មានអំពីការសម្លាប់មិនទាន់លេចធ្លោយរហូតបដល់ពេលនេះ។

អង្គការ Amnesty បានអំពាវនាវឲ្យអង្គការសហប្រជាជាតិស៊ើបអង្កេត និងការពារអ្នកដែលប្រឈមគ្រោះថ្នាក់ទាំងនោះ។

តាលីបង់ត្រូវបានគេដឹងថា គ្រប់គ្រងអាហ្វហ្គានីស្ថានយ៉ាងឃោឃៅដោយបានដកហូតសិទ្ធិស្ត្រី និងជនជាតិភាគតិច មុនពេលត្រូវបានកម្លាំងបរទេសចម្រុះដឹកនាំដោយអាមេរិកផ្តួលរំលំកាលពីឆ្នាំ២០០១។

សន្និសីទសារព័ត៌មានលើកដំបូងបន្ទាប់ពីកាន់កាប់រដ្ឋធានីកាប៊ុល ក្រុមតាលីបង់បានសន្យាមិនសងសឹកលើនរណាម្នាក់ដែលធ្វើការឲ្យកម្លាំងអាមេរិក និង NATO បុគ្គលិករដ្ឋាភិបាលចាស់ ហើយផ្តល់សិទ្ធិដល់ស្ត្រីស្របតាមច្បាប់ឥស្លាម sharia និងគោរពសិទ្ធិសារព័ត៌មាន។

ប៉ុន្តែបើយោងតាមឯកសារអង្គការសហប្រជាជាតិបានព្រមានថា សកម្មប្រយុទ្ធតាលីបង់បានកំពុងតាមប្រមាញ់អ្នកធ្វើការឲ្យកម្លាំងអាមេរិក និង NATO បុគ្គលិករដ្ឋាភិបាលចាស់ដល់ផ្ទះតែម្តង។

តើនរណាជនជាតិភាគតិច Hazara?

មានដើមកំណើតនៅម៉ុងហ្គោលី និងអាស៊ីកណ្តាល។
ពួកគេជាអ្នកជំនាន់ក្រោយរបស់ Genghis Khan និងទាហានរបស់ពួកគេដែលវាយលុកអាហ្វហ្គានីស្ថាននៅសតវត្សរ៍ទី១៣។
គោរពប្រតិបត្តិសាសនាឥស្លាម Shia Islam នៅអាហ្វហ្គានីស្ថាន និងប៉ាគីស្ថានដែលមានអ្នកកាន់សាសនាឥស្លាម Sunni ច្រើន។
មានចំនួនប្រមាណ៩% នៃប្រជាជនអាហ្វហ្គានីស្ថាន៣៩.៩លាននាក់។
ទទួលរងការធ្វើទុក្ខបុកម្នេញយ៉ាងធ្ងន់ធ្ងរដោយក្រុមតាលីបង់កាលពីអតីតកាល។

ប្រែសម្រួល៖ វីរបុត្រ
ប្រភព៖ BBC

Related Topics:ប្រទេសអាហ្វហ្គានីស្ថាន Hazara minority