គ្រាន់តែចម្អិនម្ហូបមិនឆ្ងាញ់ ក្រុមតាលីបង់ ដុតស្រ្តីអាហ្វហ្គានីស្ថាន

ស្ត្រីម្នាក់ត្រូវបានក្រុមយុទ្ធជនតាលីបង់ដុតភ្លើង ដោយសារតែនាងត្រូវបានចោទប្រកាន់ពីបទ “ចម្អិនម្ហូបមិនឆ្ងាញ់” ។ ឧប្បត្តិហេតុនេះបានកើតឡើង ខណៈដែលស្ត្រីដទៃទៀតនៅក្នុងប្រទេសក៏ត្រូវបានគេរាយការណ៍ថា ត្រូវបានបង្ខំឲ្យធ្វើជាទាសករផ្លូវភេទសម្រាប់ក្រុមបះបោរមួយនេះ ។

អតីតចៅក្រម និងជាសកម្មជនអាហ្វហ្គានីស្ថានលោកស្រី Najla Ayoubi បានប្រាប់ទូរទស្សន៍ Sky News ថា “មានយុវនារីជាច្រើនក្នុងរយៈពេលប៉ុន្មានសប្តាហ៍ចុងក្រោយនេះ ត្រូវបានបញ្ជូនទៅប្រទេសជិតដោយពួននៅក្នុងមឈូសដើម្បីគេចចេញពីការប្រើជាទាសករផ្លូវភេទ” ។

សកម្មជនរូបនេះបានកត់សម្គាល់បន្ថែមទៀតថា មេដឹកនាំតាលីបង់កំពុងបង្ខំឲ្យគ្រួសាររៀបការជាមួយកូនស្រីតូចៗរបស់ពួកគេ ដោយសង្កត់ធ្ងន់ថា នាងមិនបានឃើញក្រុមបះបោរកំពុងរក្សាការសន្យារបស់ពួកគេ ក្នុងការការពារសិទ្ធិស្ត្រីដោយច្បាប់ឥស្លាមឡើយ ។

ថ្វីត្បិតតែក្រុមតាលីបង់បានសន្យាផ្តល់ឲ្យស្ត្រីអាហ្វហ្គានីស្ថាន នូវសិទ្ធិទាំងអស់តាមច្បាប់ Sharia និងច្បាប់អាហ្វហ្គានីស្ថានក៏ដោយ ក៏មានរបាយការណ៍ជាច្រើនបានបង្ហាញថា ស្ថានភាពជុំវិញសិទ្ធិស្ត្រីនៅក្នុងប្រទេសនេះកាន់តែអាក្រក់ទៅៗ ចាប់តាំងពីការកាន់កាប់ទីក្រុងកាប៊ុល ។

កាលពីដើមសប្តាហ៍នេះ ទីភ្នាក់ងារជនភៀសខ្លួនរបស់អង្គការសហប្រជាជាតិ បានទទួលរបាយការណ៍ពីការរំលោភសិទ្ធិមនុស្សលើស្ត្រីនៅទូទាំងប្រទេសអាហ្វហ្គានីស្ថាន ដោយនៅតំបន់ខ្លះស្ត្រីមិនត្រូវបានអនុញ្ញាតឲ្យទៅធ្វើការឡើយ ។

គួរកត់សម្គាល់ថា ស្ត្រីជាច្រើនបានដើរក្បួននៅទូទាំងរដ្ឋធានីអាហ្វហ្គានីស្ថានកាលពីថ្ងៃទី ១៧ ខែសីហា ជាមួយផ្ទាំងបដាដោយស្រែកទាមទារឲ្យគោរពសិទ្ធិនយោបាយ សិទ្ធិស៊ីវិល និងសិទ្ធិស្ត្រី ។ បាតុករជាស្ត្រីបានដើរឆ្លងកាត់ទីក្រុងដោយគ្មានការប្រឆាំង ឬនរណាម្នាក់ព្យាយាមរារាំងពួកគេឡើយ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តាលីបង់ រារាំងមន្ត្រីរដ្ឋាភិបាល អាហ្វហ្គានីស្ថាន មិនឲ្យចូលធ្វើការ ដោយប្រាប់ពួកគេមើលទូរទស្សន៍ ឬស្ដាប់វិទ្យុរង់ចាំការជូនដំណឹង