ព័ត៌មានអន្ដរជាតិ

លោក ត្រាំ វាយប្រហារលោក បៃដិន ថា អាម៉ាស់មុខបំផុតនៅអាហ្វហ្គានីស្ថាន

បានផុស

៣ years មុន

នៅ

ថ្ងៃចន្ទ ២៣ សីហា ២០២១

ដោយ

អតីតប្រធានាធិបតីអាមេរិក លោក ដូណាល់ ត្រាំ នៅថ្ងៃអាទិត្យ ទី២២ ខែសីហា បានបើកការវាយប្រហារលើលោកប្រធានាធិបតីអាមេរិក ចូ បៃដិន ជុំវិញការដកកងទ័ពអាមេរិកចេញពីប្រទេសអាហ្វហ្គានីស្ថានតាមអ្វីដែលលោកហៅថា «ជារឿងអាម៉ាស់មុខគោលនយោបាយការបរទេសបំផុតនៅក្នុងប្រវត្តិសាស្ត្រអាមេរិក»។

លោក ដូណាល់ ត្រាំ មកពីគណបក្សសាធារណៈដែលកំពុងប្រុងប្រែងដើម្បីលទ្ធភាពឈរបោះឆ្នោតប្រធានាធិបតីម្តងទៀតនៅឆ្នាំ២០២៤បានស្តីបន្ទោសម្តងហើយម្តងទៀតលើលោក ចូ បៃដិន ដែលមកពីគណបក្សប្រជាធិបតេយ្យចំពោះបរាជ័យរបស់អាហ្វហ្គានីស្ថានទៅកណ្តាប់ដៃរបស់សកម្មប្រយុទ្ធតាលីបង់ បើទោះជាការដកទ័ពអាមេរិកដែលនាំឲ្យដួលរលំនេះបានចរចារផ្ទាល់ដោយរដ្ឋបាលរបស់លោកក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ មានប្រសាសន៍ក្នុងការជួបជុំអ្នកគាំទ្ររបស់លោកនៅជិត Cullman រដ្ឋ Alabama ថា ៖«ការចាកចេញដ៏វឹកវររបស់លោក បៃដិន ពីអាហ្វហ្គានីស្ថានគឺបង្ហាញពីការភ្ញាក់ផ្អើលបំផុតនៃអសមត្ថភាពរបស់មេដឹកនាំប្រទេសមួយ»។

មេដឹកនាំតាលីបង់បានកំពុងត្រៀមបង្កើតរដ្ឋាភិបាលថ្មីមួយ បន្ទាប់ពីកម្លាំងទ័ពរបស់ពួកគេកាន់កាប់ប្រទេស ស្របពេលកម្លាំងទ័ពដឹកនាំដោយអាមេរិកបានដកចេញ ក្រោយបំពេញបេសកកម្មរយៈពេល២០ឆ្នាំ។

ចំពោះបញ្ហានេះ លោក បៃដិន បានរិះគន់កងទ័ពអាហ្វហ្គានីស្ថានចំពោះការបដិសេធប្រយុទ្ធ។ លោកថ្កោលទោសរដ្ឋាភិបាលអាហ្វហ្គានីស្ថានដែលត្រូវបានបណ្តេញចេញ និងប្រកាសថា លោកទទួលកិច្ចព្រមព្រៀងដកទ័ពដ៏អាក្រក់ពីលោក ត្រាំ។

នៅក្នុងការជួបជុំនោះ លោក ដូណាល់ ត្រាំ បានបន្ទោសស្ថានភាពលើ លោក ចូ បៃដិន ដែលមិនអនុវត្តតាមផែនការដែលរដ្ឋបាលរបស់លោកបានដាក់ចេញ និងបានសម្តែងការសោកស្តាយចំពោះបុគ្គលិក និងឧបករណ៍អាមេរិកដែលទុកចោលនៅពេលកម្លាំងទ័ពដកចេញ។

លោក ត្រាំ មានប្រសាសន៍ថា ៖«នេះមិនមែនជាការដកទ័ពទេ។ នេះគឺជាការចុះចាញ់ទាំងស្រុង»។ យើងអាចចាកចេញដោយកិត្តិយស។ យើងគួរចាកចេញដោយកិត្តិយស។ ផ្ទុយទៅវិញ យើងទទួលបានលទ្ធផលផ្ទុយពីកិត្តិយស»៕