ព័ត៌មានអន្ដរជាតិ

អ្នកស្លាប់កូវីដជាមធ្យម១០០នាក់ក្នុងមួយថ្ងៃបង្កកង្វល់ដល់អង់គ្លេសបើកសាលាសប្តាហ៍ក្រោយ

បានផុស

៣ years មុន

នៅ

ថ្ងៃអង្គារ ២៤ សីហា ២០២១

ដោយ

យោងតាមទិន្នន័យផ្លូវការបានបង្ហាញថា ករណីស្លាប់ដោយកូវីដ-១៩នៅចក្រភពអង់គ្លេសឥឡូវនេះជាមធ្យម១០០នាក់ក្នុងមួយថ្ងៃគិតទូទាំងចក្រភពអង់គ្លេស ហើយអ្នកវិទ្យាសាស្ត្របានព្រមានថា អត្រាឆ្លង និងស្លាប់កើនឡើងខ្ពស់ទៀតធ្វើឲ្យបារម្ភដល់កូនសិស្សរាប់លាននាក់ត្រូវចូលរៀនវិញសប្តាហ៍ក្រោយ។

ទិន្នន័យចេញផ្សាយដោយសុខាភិបាលសាធារណៈអង់គ្លេសកាលពីថ្ងៃចន្ទបង្ហាញថា គិតជាមធ្យម៧ថ្ងៃសម្រាប់ករណីស្លាប់ក្នុងរយៈពេល២៨ថ្ងៃនៃការធ្វើតេស្តវិជ្ជមានឥឡូវនេះ១០០នាក់។ តួលេខដែលលើសនេះចុងក្រោយកាលពីថ្ងៃទី១៨ ខែមីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាកម្មវិធីចាក់វ៉ាក់សាំងដែលធ្វើឲ្យ ករណីស្លាប់ស្ថិតក្រោមតួលេខខ្ពស់បំផុត បើប្រៀបធៀបនឹងកាលពីរដូវរងា ក៏ករណីឆ្លងថ្មីប្រចាំថ្ងៃខ្ពស់បំផុតត្រឹមតែ ១២៤៨នាក់ដែលត្រូវបានរាយការណ៍កាលពីថ្ងៃទី២៣ ខែមករា ដែលចំនួនគួរឲ្យកត់សំគាល់គិតចាប់ពីចុងខែឧសភា ដល់ដើមខែមិថុនា នៅពេលតួលេខឆ្លងស្ថិតនៅតែមួយខ្ទង់។

ចំនួនឆ្លងដែលត្រូវបានបញ្ជាក់ក៏បានចាប់ផ្តើមកើនឡើងជាថ្មីម្តងទៀត បន្ទាប់ពីការធ្លាក់ចុះក្នុងពាក់កណ្តាលខែកក្កដា ខណៈករណីឆ្លងថ្មីកាលពីថ្ងៃចន្ទនេះមានចំនួន ៣១៩១៤នាក់ ដែលជាមធ្យម៧ថ្ងៃកើនឡើង១៣%។ ករណីចូលព្យាបាលនៅមន្ទីរពេទ្យបានកើនពី៦៧២នាក់កាលពីថ្ងៃទី៣១ ខែកក្កដា ដល់ ៩៤៨នាក់កាលពីថ្ងៃទី១៧ ខែសីហា។

ករណីកើនឡើងជាថ្មីនេះបង្កើនក្តីបារម្ភបន្ថែមទៀតចំពេលសិស្សានុសិស្សនឹងត្រូវវិលត្រឡប់ទៅសាលារៀនវិញនៅសប្តាហ៍ក្រោយទូទាំងប្រទេសអង់គ្លេស អៀរឡង់ខាងជើង និងវែល។ ករណីឆ្លងនៅប្រទេសស្កុតឡែនដែលសិស្សបានទៅសាលារៀនវិញតាំងពីសប្តាហ៍មុនក៏បានកើតឡើងគួរឲ្យកត់សំគាល់ដែរគឺកើនពីចំនួន ៧៩៩នាក់កាលពីថ្ងៃទី២ ខែសីហា ដល់ ៣១៩០នាក់កាលពីថ្ងៃអាទិត្យកន្លងទៅនេះ។

អ្នកវិទ្យាសាស្ត្រមួយចំនួនបានព្រមានថា ការកើនឡើងកូវីដ-១៩នៅរដូវស្លឹកឈើជ្រុះ និងរដូវរងា រួមជាមួយនឹងជំងឺផ្សេងៗទៀត ទាមទារឲ្យពាក់ម៉ាស់ដើម្បីកាត់បន្ថយការឆ្លង។

លោកសាស្ត្រាចារ្យ Ravi Gupta នៅសាកលវិទ្យាល័យ Cambridge បាននិយាយថា វាទំនងជាអូសបន្លាយពេលវេលាយូរទៀតស្របពេលករណីឆ្លងចូលមន្ទីរពេទ្យឡើងខ្ពស់ និងការរំខានដល់ការបើកសាលារៀនឡើងវិញ។

លោកបញ្ជាក់ថា ៖«មិនមានអ្វីបញ្ឈប់មិនឲ្យកើតឡើងបានទេ ពីព្រោះ នៅមានមនុស្សណាស់ដែលមិនទាន់ឆ្លង Delta និងអ្នកដែលនឹងឆ្លង ហើយពួកគេមួយចំនួននឹងឈឺធ្ងន់ជាងអ្នកផ្សេង។ ដូច្នេះ ខ្ញុំគិតថា នៅមានវិធីមួយអាចទប់ទល់បានសម្រាប់ការបើកសាលាឡើងវិញ»។ ក្នុងន័យនេះលោក Gupta បានសំដៅដល់ការអនុវត្តឡើងវិញនូវការពាក់ម៉ាស់។

នៅចក្រភពអង់គ្លេសការពាក់ម៉ាស់មិនមែនជាច្បាប់តម្រូវការទេឥឡូវនេះ។ ប្រជាជនអាចពាក់ម៉ាស់ក៏បាន មិនពាក់ក៏បានគឺអាស្រ័យលើបុគ្គលម្នាក់។ ជាក់ស្តែងការប្រកួតបាល់ទាត់រាល់សប្តាហ៍ឥឡូវនេះអនុញ្ញាតឲ្យអ្នកទស្សនាចូលមើលផ្ទាល់ពេញៗកីឡដ្ឋានតែម្តងដែលអ្នកខ្លះក៏ពាក់ម៉ាស់ ហើយអ្នកខ្លះមិនពាក់ទេ៕

ប្រែសម្រួល៖ វីរបុត្រ
ប្រភព៖ theguardian