អនុប្រធានាធិបតីអាហ្វហ្គានីស្ថាន ថា អាល់កៃដា និងតាលីបង់ ជាក្រុមតែមួយ ដូចរសជាតិ កូកា និងប៉ិបស៊ី អញ្ចឹង

អនុប្រធានាធិបតីអាហ្វហ្គានីស្ថានលោក Amrullah Saleh នៅក្នុងបទសម្ភាសន៍ជាមួយទូរទស្សន៍ Fox News បានបង្ហាញពីភាពដូចគ្នារវាងក្រុមភេរវករដូចជា អាល់កៃដា ISIS និងតាលីបង់ ពោលពួកគេគឺជាក្រុមតែមួយ ។

អ្នកនយោបាយ ដែលជាសមាជិកចុងក្រោយម្នាក់នៃរដ្ឋាភិបាលអាហ្វហ្គានីស្ថាន ដែលនៅតែបន្តប្រយុទ្ធជាមួយតាលីបង់ បានប្រៀបធៀបក្រុមភេរវករទាំង ៣ ខាងលើទៅនឹងភេសជ្ជៈដែលមានប្រជាប្រិយភាពចំនួន ២ គឺ “កូកា និងប៉ិបស៊ី” ដែលជាភេសជ្ជៈកាបូនផលិតដោយស្ករសរបស់អាមេរិក មានរសជាតិដូចគ្នា ។

លោក Saleh បានកត់សម្គាល់ថា “តាមឧត្ដមគតិរបស់ខ្ញុំ ភាពខុសគ្នារវាងក្រុម ISIS ក្រុមអាល់កៃដា និងតាលីបង់ គឺជាភាពខុសគ្នារវាងរសជាតិរបស់កូកា និងប៉ិបស៊ី ។ ប៉ុន្តែប្រសិនបើអ្នកដកស្លាកវាចេញ តើអ្នកអាចនិយាយថាមួយណាជាកូកា និងមួយណាជាប៉េបស៊ីទេ?” ។

លោក Saleh បានសង្កត់ធ្ងន់ថា ក្រុមតាលីបង់មិនអាចជឿទុកចិត្តបានទេ ដោយសំដៅទៅលើកិច្ចព្រមព្រៀងសន្តិភាពអាមេរិកឆ្នាំ ២០២០ ជាមួយក្រុមបះបោរដែលបានយល់ព្រមការពារក្រុមអាល់កៃដា មិនឲ្យចូលទៅក្នុងទឹកដីក្រោមការគ្រប់គ្រងរបស់ខ្លួន ។ លោកអនុប្រធានាធិបតីអាហ្វហ្គានីស្ថានបានអះអាងថា ពួកតាលីបង់ជឿត្រឹមតែថា “អក្សរសិល្ប៍ជីហាដរបស់ពួកគេនឹងឈ្នះ” ប៉ុណ្ណោះ ។

ក្រុមតាលីបង់បានអះអាងថា ខ្លួនកំពុងស្វែងរកនូវសន្តិភាពដល់អាហ្វហ្គានីស្ថាន ក៏ដូចជាការធ្វើជាគំរូនៃការគ្រប់គ្រងរបស់ខ្លួនក្រោមចក្ខុវិស័យអភិរក្ស ដែលកំណត់ដោយការយល់ដឹងរបស់ក្រុមនេះចំពោះច្បាប់ឥស្លាម Sharia ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ក្រុមតាលីបង់ យករំពាត់វាយអ្នកស្លៀកពាក់បែបលោកខាងលិចនៅតាមផ្លូវ ខណៈតម្លៃ burqa ឡើងមួយទ្វេជាពីរ