លោក Duterte យល់ព្រមឈរឈ្មោះក្នុងតំណែងថ្មីសម្រាប់ការបោះឆ្នោតឆ្នាំ ២០២២

គណបក្ស PDP-Laban បាននិយាយនៅថ្ងៃអង្គារនេះថា ប្រធានាធិបតីហ្វីលីពីនលោក Rodrigo Duterte បានយល់ព្រមធ្វើជាបេក្ខជនអនុប្រធានាធិបតីរបស់គណបក្សកាន់អំណាច ក្នុងការបោះឆ្នោតនៅឆ្នាំក្រោយ ។

គណបក្ស PDP-Laban បានធ្វើការប្រកាសបែបនេះ មុនពេលកិច្ចប្រជុំសភានៅថ្ងៃទី ៨ ខែកញ្ញា ហើយត្រូវបានគេរំពឹងផងដែរថា នឹងគាំទ្រជំនួយការរបស់លោក Duterte និងជាសមាជិកព្រឹទ្ធសភាបច្ចុប្បន្នលោក Christopher “Bong” ដើម្បីក្លាយជាបេក្ខជនប្រធានាធិបតីនៅក្នុងការបោះឆ្នោតឆ្នាំ ២០២២ ។

នៅហ្វីលីពីន ប្រធានាធិបតីត្រូវបានកំណត់ត្រឹមមួយអាណត្តិ ៦ ឆ្នាំប៉ុណ្ណោះ ហើយអាណត្តិរបស់លោក Duterte នឹងត្រូវបញ្ចប់នៅខែមិថុនាឆ្នាំក្រោយ ។

ទោះយ៉ាងណាការកាន់តំណែងជាអនុប្រធានាធិបតីរបស់លោក ត្រូវបានអ្នកសង្កេតការណ៍នយោបាយមើលឃើញថា ជាច្រកចូលទៅកាន់តំណែងប្រធានាធិបតីនៅអាណត្តិក្រោយៗទៀត ។

គួរបញ្ជាក់ថា លោក Rodrigo Duterte វ័យ ៧៦ ឆ្នាំគឺជាប្រធានាធិបតីហ្វីលីពីនទី ១៦ ហើយលោកឡើងកាន់តំណែងមួយនេះកាលពីថ្ងៃទី ៣០ ខែមិថុនា ឆ្នាំ ២០១៦ បន្ទាប់ពីឈ្នះសំឡេងឆ្នោតយ៉ាងភ្លូកទឹកភ្លូកដីលើលោក Benigno Aquino ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ សោកស្ដាយ! Manny Pacquiao ចាញ់អ្នកប្រដាល់គុយបា Yordenis Ugas ដោយពិន្ទុឯកច្ឆ័ន្ត