យោធាអាមេរិក មិនមានសមត្ថភាពជួយសង្គ្រោះជនជាតិរបស់ខ្លួន ដែលជាប់នៅខាងក្រៅទីក្រុង កាប៊ុល បានទេ

លោក John Kirby អ្នកនាំពាក្យមន្ទីរបញ្ចកោណ បាននិយាយថា យោធាអាមេរិកមិនមានសមត្ថភាពជួយសង្គ្រោះជនជាតិអាមេរិកនិងអាហ្វហ្គានីស្ថាន ដែលចង់ចាកចេញពីប្រទេសខណៈពួកគេកំពុងស្ថិតនៅខាងក្រៅទីក្រុងកាប៊ុលបាននោះទេ។

លោក Kirby បានប្រាប់អ្នកយកព័ត៌មានថា “ខ្ញុំមិនចង់ដាក់ការរំពឹងទុកថា យើងនឹងអាចហោះហើរទូទាំងប្រទេស ដើម្បីយកមនុស្សបាននោះទេ”។

មន្ទីរបញ្ចកោណបានបញ្ជាក់ថា យោធាអាមេរិកបានប្រើឧទ្ធម្ភាគចក្រ ដើម្បីដឹកមនុស្សចូលទៅក្នុងអាកាសយានដ្ឋានចំនួន ៣ លើកមកហើយ ហើយនិយាយថា រដ្ឋាភិបាលអាមេរិកកំពុងទទួលការអំពាវនាវសុំជំនួយពីអ្នកដទៃ។

ក្នុងចំណោមពួកគេ មានជនជាតិអាហ្វហ្គានីស្ថានចំនួន៤០នាក់ មកពីទីក្រុង San Diego រដ្ឋកាលីហ្វ័រញ៉ា ដែលមិនអាចទៅដល់ទីក្រុងកាប៊ុលបាន។ នេះបើយោងតាមកាសែត San Diego Union-Tribune។

លោក Kirby និយាយថា “មានដែនកំណត់ចំពោះសមត្ថភាពរបស់យើង នៅទីនេះ។ ប៉ុន្តែនៅពេលដែលយើងអាចជួយបាន ហើយប្រសិនបើយើងត្រូវការយន្តហោះដើម្បីជួយ យើងនឹងធ្វើវា”៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ពលរដ្ឋ អាហ្វហ្គានីស្ថាន ដែលមានឯកសារស្របច្បាប់ សង្ឃឹមជម្លៀសចេញពីប្រទេស ក្រោយដាច់ខែនេះ