ជនភៀសខ្លួនអាហ្វហ្គានីស្ថានម្នាក់ទៀត សម្រាលកូនលើយន្តហោះ (មានវីដេអូ)

ជនភៀសខ្លួនអាហ្វហ្គានីស្ថានម្នាក់ ដែលកំពុងធ្វើដំណើរទៅចក្រភពអង់គ្លេស បានផ្តល់កំណើតដល់ទារិកាម្នាក់ នៅរយៈកម្ពស់ ៣០,០០០ ហ្វីត ខណៈជិះយន្តហោះជម្លៀសទៅកាន់ទីក្រុង Birmingham។

នៅពេលសម្រាលកូន នាង Soman Noori អាយុ២៦ឆ្នាំ កំពុងស្ថិតនៅលើជើងហោះហើរចេញពីទីក្រុង ឌូបៃ ទៅកាន់ទីក្រុង Birmingham ក្រោយពេលនាងចាកចេញពីទីក្រុង កាប៊ុល។ 

ដោយគ្មានវេជ្ជបណ្ឌិតនៅលើយន្តហោះ សមាជិកកាប៊ីន បានជួយសម្រាលទារិកាដែលមានឈ្មោះ Havva ឬជាភាសាអង់គ្លេសថា Eve។

ក្រុមហ៊ុនអាកាសចរណ៍បាននិយាយថា ទាំងម្តាយនិងកូនគឺមានសុខភាពល្អ។

នាង Noori បានធ្វើដំណើរជាមួយស្វាមីរបស់នាងឈ្មោះ Taj Moh Hammat អាយុ ៣០ ឆ្នាំនិងកូនពីរនាក់ទៀត។

ក្រុមហ៊ុនអាកាសចរណ៍ទួរគីនិយាយថា ជើងហោះហើរនេះ បានចុះចតនៅប្រទេសគុយវ៉ែត ជាវិធានការការពារជាមុន មុននឹងបន្តដំណើរទៅកាន់ទីក្រុង Birmingham ហើយចុះចតនៅម៉ោង ១១ និង ៤៥ នាទីព្រឹកថ្ងៃសៅរ៍។

គួរបញ្ជាក់ថា ការចាប់កំណើតរបស់ Havva បានកើតឡើងប៉ុន្មានថ្ងៃ បន្ទាប់ពីស្ត្រីអាហ្វហ្គានីស្ថានម្នាក់ទៀត សម្រាលកូនខណៈកំពុងជិះយន្តហោះជម្លៀសទៅកាន់ប្រទេសអាល្លឺម៉ង់៕

វីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ជនជាតិអាហ្វហ្គានីស្ថានដែលមកដល់អង់គ្លេស ត្រូវទុកចោល ដោយសារគោលនយោបាយ ក្រសួងមហាផ្ទៃ