អាហ្វ្រិកខាងត្បូង រកឃើញវីរុសបំប្លែងខ្លួនថ្មីមួយទៀត ឆ្លងលឿន និងធន់អង់ទីគ័រពីការចាក់វ៉ាក់សាំងជាងប្រភេទដើម

អ្នកស្រាវជ្រាវមួយក្រុមនៅអាហ្វ្រិកខាងត្បូងបានរកឃើញវីរុសបំប្លែងខ្លួនថ្មី ហើយវាអាចឆ្លងលឿន និងធន់អង់ទីគ័រប្រឆាំងកូវីដដែលដុះចេញពីការចាក់វ៉ាក់សាំង ជាងប្រភេទដើមទៅទៀត ។

វីរុសបំប្លែងខ្លួនថ្មីនេះជាប្រភេទ C.1.2 ត្រូវបានកំណត់ដោយក្រុមអ្នកស្រាវជ្រាវនៅវិទ្យាស្ថានជាតិជំងឺឆ្លង KwaZulu-Natal ។ វាត្រូវបានគេរកឃើញដំបូងនៅអាហ្វ្រិកខាងត្បូងនៅខែឧសភា ឆ្នាំ ២០២១ ហើយចាប់តាំងពីពេលនោះមក បានលេចចេញនៅតាមបណ្តាប្រទេសនានានៅទូទាំងពិភពលោក រួមមានចិន សាធារណរដ្ឋប្រជាធិបតេយ្យកុងហ្គោ ម៉ូរីស នូវែលសេឡង់ អង់គ្លេស ព័រទុយហ្គាល់ និងស្វីស ។

នៅក្នុងសិក្សាមួយដែលត្រូវបានគេបង្ហោះទៅគេហទំព័រ medRxiv.org បានឲ្យដឹងថា ពូជថ្មីនេះត្រូវបានផ្សារភ្ជាប់ជាមួយនឹងការគេចពីអង់ទីគ័រថ្នាក់ទី ៣ នៃការចាក់វ៉ាក់សាំងប្រឆាំងនឹងមេរោគឆ្លង ។

ពូជ C.1.2 ក៏ត្រូវបានគេនិយាយផងដែរថា មានអត្រាវិវត្តប្រហែល ៤១.៨ ក្នុងមួយឆ្នាំ ពោលស្ទើរតែច្រើនជាងទ្វេដងជាងវីរុសបំប្លែងខ្លួនផ្សេងទៀត ។

ពូជថ្មីនេះត្រូវបានគេនិយាយថា វិវត្តពីវីរុសបំប្លែងខ្លួន C.1 ដែលជាខ្សែស្រឡាយមួយក្នុងចំណោមពូជជាច្រើនដែលគ្របដណ្តប់លើរលកដំបូងនៃការឆ្លងវីរុស SARS-Cov-2 នៅអាហ្វ្រិកខាងត្បូង ហើយត្រូវបានគេរកឃើញចុងក្រោយនៅក្នុងប្រទេសនេះនៅខែមករា ឆ្នាំ ២០២១ ។

ចាប់តាំងពីពេលនោះមក វាត្រូវបានគេរកឃើញនៅទូទាំងខេត្តភាគច្រើននៅអាហ្វ្រិកខាងត្បូង និងនៅក្នុងប្រទេសចំនួន ៧ នៅទ្វីបអាហ្រ្វិក អឺរ៉ុប អាស៊ី និងអូសេអានី ។

គួរបញ្ជាក់ថា គិតត្រឹមសប្តាហ៍មុនប្រហែល ១៧.៦ ភាគរយនៃប្រជាជនអាហ្វ្រិកខាងត្បូងចំនួន ៥៨.៥៦ លាននាក់ ត្រូវបានចាក់វ៉ាក់សាំង ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ វីរុសបំប្លែងខ្លួន Delta ត្រូវគេរកឃើញនៅក្នុងច្រមុះ អ្នកចាក់វ៉ាក់សាំងរួច ច្រើនដូចអ្នកមិនចាក់វ៉ាក់សាំងដែរ