តាលីបង់ ថា មិនចាំបាច់បង្កើត “តំបន់សុវត្ថិភាព” នៅក្រុងកាប៊ុលឡើយ អាហ្វហ្គានីស្ថានឯករាជ្យហើយ

ក្រុមតាលីបង់កាលពីថ្ងៃអាទិត្យបានបោះបង់គំនិតបង្កើត “តំបន់សុវត្ថិភាព” ដែលគ្រប់គ្រងដោយអង្គការសហប្រជាជាតិ (UN) នៅទីក្រុងកាប៊ុល ថាវាមិនចាំបាច់ ។

ប្រធានាធិបតីបារាំងលោក Emmanuel Macron បាននិយាយកាលពីថ្ងៃសៅរ៍ថា ទីក្រុងប៉ារីស និងទីក្រុងឡុងដ៍នឹងជួបពិភាក្សាគ្នានៅថ្ងៃចន្ទនេះ ដើម្បីពិភាក្សាពីការបង្កើត “តំបន់សុវត្ថិភាព” ដើម្បីអនុញ្ញាតឲ្យមានការបន្តប្រតិបត្តិការមនុស្សធម៌ ។

ទន្ទឹមនោះ អ្នកនាំពាក្យតាលីបង់លោក Suhail Shaheen បានប្រាប់ទូរទស្សន៍ France Inter ថា “វាមិនចាំបាច់ទេ ។ អាហ្វហ្គានីស្ថានគឺជាប្រទេសឯករាជ្យ ។ តើតំបន់បែបនេះអាចត្រូវបានបង្កើតឡើងនៅបារាំង ឬចក្រភពអង់គ្លេសបានទេ? ” ។

លោកបានបន្ថែមថា ទោះយ៉ាងណាតាលីបង់បានគាំទ្រគំនិតនៃការឈានដល់កិច្ចព្រមព្រៀង ជាមួយប្រទេសខ្លះដើម្បីជួយចលនាស្តារប្រតិបត្តិការឡើងវិញនៃអាកាសយានដ្ឋានកាប៊ុល ។

គួរបញ្ជាក់ថា អាហ្វហ្គានីស្ថានបានធ្លាក់ទៅលើដៃក្រុមតាលីបង់កាលពីថ្ងៃទី ១៥ ខែសីហា ខណៈដែលប្រទេសក្រៅបានចាប់ផ្តើមជម្លៀសពលរដ្ឋ និងអ្នកការទូតរបស់ខ្លួន ហើយពលរដ្ឋអាហ្វហ្គានីដែលងាយរងគ្រោះរាប់ពាន់នាក់ បានប្រញាប់ប្រញាល់ទៅកាន់អាកាសយានដ្ឋានកាប៊ុល ក្នុងក្តីសង្ឃឹមដើម្បីភៀសខ្លួន ។

ទន្ទឹមនោះ ព្រលានយន្តហោះដែលមានមនុស្សច្រើន បែរជាត្រូវបានវាយប្រហារដោយភេរវកររដ្ឋឥស្លាមកាលពីថ្ងៃព្រហស្បតិ៍ ដែលជំរុញឲ្យសហរដ្ឋអាមេរិកសងសឹក ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ការវាយប្រហារដោយយន្តហោះដ្រូន អាមេរិក មិនមែនចំក្រុម ISIS-K ទេ បែរទៅប៉ះគ្រួសារស្លូតត្រង់ ស្លាប់ភាគច្រើនជាក្មេង