សមាជិក១០នាក់ក្នុងគ្រួសារមួយរួមទាំងកុមារច្រើននាក់ ត្រូវស្លាប់ ដោយសារការវាយប្រហាររបស់អាមេរិក នៅអាហ្វហ្គានីស្ថាន

ក្រុមមន្រ្តីអាមេរិកបាននិយាយថា ការវាយប្រហារដោយយន្តហោះគ្មានមនុស្សបើកកាលពីថ្ងៃអាទិត្យ គឺសំដៅទៅលើរថយន្ត ផ្ទុកសារធាតុផ្ទុះដ៏ច្រើនសន្ធឹកសន្ធាប់ ដែលកំពុងធ្វើដំណើរឆ្ពោះទៅកាន់អាកាសយានដ្ឋានក្រុងកាប៊ុល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពួកគេនិយាយថា ការវាយប្រហារនេះបានបណ្តាលឲ្យមានការផ្ទុះ ហើយថា ពួកគេកំពុងបន្តវាយតម្លៃស្ថានការណ៍។

ប៉ុន្តែមិនដូច្នោះទេ សមាជិក១០នាក់ នៃគ្រួសារអាហ្វហ្គានីស្ថាន ត្រូវបានសម្លាប់ ក្នុងការវាយប្រហារនោះ។ នេះបើយោងតាមការអះអាងពីសាច់ញាតិ។

លោក Zemaray Ahmadi អាយុ៣៦ឆ្នាំ ត្រូវបានសម្លាប់រួមជាមួយកូនប្រុសរបស់គាត់ឈ្មោះ Zamir អាយុ ២០, Faisal អាយុ១៦ឆ្នាំនិង Farzad អាយុ១២ឆ្នាំ។

ក្មួយស្រីនិងក្មួយប្រុសរបស់គាត់ចំនួនប្រាំមួយនាក់ ក៏បានស្លាប់ផងដែរ។ ក្នុងនោះមានក្មេងប្រុសនិងក្មេងស្រីអាយុពីរឆ្នាំ, ក្មេងស្រីអាយុ ៥ និង ៧ ឆ្នាំ, ក្មេងប្រុសអាយុ ៦ ឆ្នាំ និងបុរសអាយុ ២៨ ឆ្នាំ។

គ្រួសារនេះនិយាយថា លោក Ahmadi បានធ្វើការជាវិស្វករបច្ចេកទេស ជាមួយអង្គការបរទេសមួយនៅទីក្រុងកាប៊ុលអស់រយៈពេល ១០ ឆ្នាំមកហើយ។

បងប្រុសរបស់ជនរងគ្រោះម្នាក់ឈ្មោះ Aymal Ahmad បានប្រាប់ទូរទស្សន៍ Sky News ថា “បងប្រុសខ្ញុំម្នាក់ កំពុងធ្វើការជាមួយពួកបស្ចិមប្រទេស។ ការទាមទាររបស់ខ្ញុំពីសហគមន៍អន្តរជាតិគឺយុត្តិធម៌ អ្វីក៏ដោយដែលបានកើតឡើងមិនគួរកើតឡើងម្តងទៀតទេ ខ្ញុំមិនខ្វល់ពីប្រធានាធិបតីបៃដិនឬអ្នកណាផ្សេងឡើយ។ ខ្ញុំបានបាត់បង់សមាជិកគ្រួសារ ១០ នាក់ដែល ធ្លាប់ញ៉ាំអីជាមួយគ្នា តើយើងត្រូវធ្វើដូចម្តេចឥឡូវនេះ?”។

ទោះបីជាយ៉ាងណាក៏ដោយ អ្នកនាំពាក្យកងទ័ពអាមេរិក លោកឧត្តមសេនីយ៍ឯក William Hank Taylor បានពណ៌នាការវាយប្រហារដោយយន្តហោះគ្មានមនុស្សបើកនេះថា ជាការវាយប្រហារអាកាសចំពោះការគំរាមកំហែងរបស់ក្រុម ISIS-K។

ការវាយប្រហារដោយយន្តហោះគ្មានមនុស្សបើកបានកើតឡើង បន្ទាប់ពីការបំផ្ទុះគ្រាប់បែកអត្តឃាតកាលពីសប្តាហ៍មុននៅអាកាសយានដ្ឋានក្រុងកាប៊ុល ដែលបានសម្លាប់យោធាអាមេរិក ១៣ នាក់ ជនជាតិអង់គ្លេស ៣ នាក់និងជនជាតិអាហ្វហ្គានីស្ថានជាច្រើននាក់ដែលប៉ុនប៉ងភៀសខ្លួនចេញពីប្រទេសបន្ទាប់ពីការចូលកាន់កាប់របស់ក្រុមតាលីបង់៕

ប្រែសម្រួល៖ Vann Vann

ប្រភព៖ Sky

ចុចអាន៖ ពិធីករអាហ្វហ្គានីស្ថាន អានព័ត៌មានទាំងព្រលឹងចុងសក់ ខណៈក្រុមតាលីបង់ឈរកាន់កាំភ្លើងនៅខាងក្រោយ ទាមទារឲ្យនិយាយសរសើរ (មានវីដេអូ)