មេដឹកនាំចលនាតស៊ូ អាហ្វហ្គានីស្ថាន នឹងលើកទង់ ស ចុះចាញ់ បើក្រុម តាលីបង់ ធានាសិទ្ធិស្មើគ្នាបានពេញប្រទេសតាមការអួតមែននោះ

មេដឹកនាំចលនាតស៊ូនៅខេត្ត Panjshir របស់អាហ្វហ្គានីស្ថានលោក Ahmad Massoud បានប្រាប់ទស្សនាវដ្តី Foreign Policy ថា គាត់នឹងបោះបង់ការតស៊ូរបស់គាត់ ឬចុះចាញ់ ប្រសិនបើក្រុមតាលីបង់បង្កើតរដ្ឋាភិបាលរួមបញ្ចូលគ្នា និងធានាសិទ្ធិស្មើគ្នាសម្រាប់ជនជាតិអាហ្វហ្គានីស្ថានទាំងអស់ ។

លោក Massoud បាននិយាយនៅក្នុងបទសម្ភាសន៍មួយដែលបានចុះផ្សាយនៅថ្ងៃទី ៣០ ខែសីហាថា “ប្រសិនបើតាលីបង់មានឆន្ទៈចែករំលែកអំណាចជាមួយមនុស្សគ្រប់គ្នា ហើយមានឆន្ទៈក្នុងការបង្កើតយុត្តិធម៌ និងផ្តល់សិទ្ធិ និងសេរីភាពស្មើភាពគ្នាដល់អាហ្វហ្គានីស្ថានទាំងអស់នោះ ខ្ញុំនឹងចុះចេញពីតំណែងជាមេដឹកនាំក្រុមចលនាតស៊ូ ហើយឈប់ធ្វើនយោបាយតែម្ដង” ។

មេដឹកនាំរូបនេះបានកត់សម្គាល់ថា រណសិរ្សតស៊ូជាតិ (NRF) មិនទទួលបានការគាំទ្រផ្នែកហិរញ្ញវត្ថុពីបរទេសឡើយ ។ ប្រទេសជាច្រើននៅក្នុងតំបន់បានចូលរួមជាមួយក្រុមតាលីបង់ ។

លោក Massoud បានបញ្ជាក់ថា “រដ្ឋាភិបាលរបស់អតីតប្រធានាធិបតីលោក Ashraf Ghani បានជំរុញប្រទេសក្នុងតំបន់ជាច្រើនឲ្យទៅក្បែរក្រុមតាលីបង់ ។ គោលនយោបាយរបស់លោក បានបង្កឲ្យមានសត្រូវជាមួយអ្នកជិតខាងរបស់យើង ហើយពួកគេកាន់តែជិតស្និទ្ធជាមួយតាលីបង់” ។

គួររំឭកថា នៅថ្ងៃទី ១៥ ខែសីហា ក្រុមតាលីបង់បានកាន់កាប់ទីក្រុងកាប៊ុល ហើយបានកាន់កាប់ប្រទេសអាហ្វហ្គានីស្ថានស្ទើរតែទាំងអស់ និងធ្វើឲយរដ្ឋាភិបាលស៊ីវិលដួលរលំ ខណៈខេត្តជ្រលងភ្នំ Panjshir ដែលមានទីតាំងស្ថិតនៅភាគឦសាននៃទីក្រុងកាប៊ុល នៅតែជាខេត្តតែមួយគត់ដែលមិនធ្លាប់ចាញ់ក្រុមតាលីបង់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មកមើលចលនាតស៊ូ អាហ្វហ្គានីស្ថាន កំពុងហ្វឹកហាត់ លុតដំ យ៉ាងសស្រាក់សស្រាំ ត្រៀមប្រយុទ្ធជាមួយក្រុម តាលីបង់