ការសិក្សា៖ កុមារមួយចំនួនបន្តចេញរោគសញ្ញាកូវីដជិត ៤ខែ ក្រោយជាសះស្បើយ

យោងតាមទិន្នន័យសិក្សាស្តីពីរោគសញ្ញាកូវីដរយៈពេលវែងចំពោះកុមារ បានឱ្យដឹងថា កុមារម្នាក់ក្នុងចំណោម ៧ នាក់ដែលឆ្លងមេរោគកូរ៉ូណាអាចបន្តមានរោគសញ្ញានៃជំងឺកូវីដជិត ៤ ខែ ក្រោយពីជាសះស្បើយ។

ការស្រាវជ្រាវបានតាមដានកុមារជិត ៧ពាន់នាក់ដែលធ្លាប់ឆ្លងវីរុសកូវីដ-១៩ ដែលមានអាយុចន្លោះពី ១១ ទៅ ១៧ ឆ្នាំ។ លទ្ធផលបង្ហាញថា ប្រមាណ ១៥ សប្តាហ៍ បន្ទាប់ពីជាសះស្បើយ កុមារនិងជំទង់ចំនួន ១៤% បន្តលេចចេញរោគសញ្ញាកូវីដដូចជា អស់កម្លាំង និងឈឺក្បាល។ ក្រៅពីនោះកុមារម្នាក់ក្នុងចំណោម ១៤ នាក់ឬស្មើ ៧% នៅមានរោគសញ្ញាផ្សេងជាច្រើនទៀត។

លោក Sir Terence Stephenson ជាសាស្រ្តាចារ្យនៅវិទ្យាស្ថានសុខភាពកុមារ UCL Great Ormond Street របស់សាកលវិទ្យាល័យ ឡុងដ៏ ចក្រភពអង់គ្លេស និងជាអ្នកសរសេរអត្ថបទសិក្សានេះ បានឱ្យដឹងថា ក្រុមរបស់ខ្លួនបានរកឃើញភស្តុតាងមួយដែលបញ្ជាក់ច្បាស់ថា ក្មេងជំទង់មួយចំនួននៅតែបន្តលេចចេញរោគសញ្ញាកូវីដរយៈពេលយូរ ទោះបីជាសះស្បើយក៏ដោយ។

ផ្អែកតាមទិន្នន័យនេះ ក្រុមអ្នកស្រាវជ្រាវបានបង្ហាញនូវការព្រួយបារម្ភយ៉ាងខ្លាំងចំពោះសុខភាពមនុស្សវ័យក្មេងធ្លាប់ឆ្លងកូវីដ ដែលវាអាចនឹងរងផលប៉ះពាល់ធ្ងន់ធ្ងរជាមួយរោគសញ្ញាកូវីដរយៈពេលវែង៕

ប្រែសម្រួល៖ សន្យា

ប្រភព៖ SKY

ចុចអាន៖ អ្នកធ្លាប់មានប្រវត្តិអាឡ័កស៊ី ក្រោយចាក់វ៉ាក់សាំងមួយប្រភេទនេះ កម្រប្រតិកម្ម ឬអាចនឹងលែងមានតែម្ដង

ចុចអាន៖ ថៃ ទើបរកឃើញរោគសញ្ញាថ្មីមួយទៀត កើតចំពោះអ្នកជាសះស្បើយពីកូវីដ ១៩