ជនជាតិអាមេរិកទទួលវ៉ាក់សាំង៣ដូស ទើបត្រូវបានចាត់ទុកថាជាអ្នកបានចាក់ពេញលេញ

លោកវេជ្ជបណ្ឌិត Anthony Fauci និយាយថា ជនជាតិអាមេរិកទំនងជាត្រូវការចាក់វ៉ាក់សាំងការពារជំងឺកូវីដ-១៩ដូសទី៣ ទើបត្រូវបានចាត់ទុកថាជាអ្នកទទួលបានវ៉ាក់សាំងពេញលេញ។

ថ្លែងក្នុងសន្និសីទកាសែតនៅសេតវិមាន លោក Fauci និយាយថា ការសម្រេចចិត្តចុងក្រោយ នឹងត្រូវធ្វើឡើងដោយរដ្ឋបាលចំណីអាហារនិងឱសថ (FDA) និងមជ្ឈមណ្ឌលត្រួតពិនិត្យនិងបង្ការជំងឺ (CDC)។

ទោះបីជាយ៉ាងណាក៏ដោយ អ្នកជំនាញខាងជំងឺឆ្លងកំពូលរបស់ប្រទេសរូបនេះបាននិយាយថា បទពិសោធន៍វិជ្ជាជីវៈរបស់លោក នាំឲ្យលោកជឿជាក់ថា វ៉ាក់សាំងប្រភេទ mRNA ដូសទី៣ នឹងត្រូវការជាចាំបាច់ ដើម្បីផ្តល់ការការពាររយៈពេលវែងប្រឆាំងនឹងកូវីដ។

សហរដ្ឋអាមេរិកកំពុងរៀបចំការចាក់ដូសជំរុញ សម្រាប់ជនជាតិអាមេរិកទាំងអស់ ដែលបានទទួលវ៉ាក់សាំងប្រភេទ mRNA ពីក្រុមហ៊ុន Pfizer និង Moderna ចន្លោះពី ៥ ទៅ ៨ ខែបន្ទាប់ពីការចាក់លើកទី២។ សហរដ្ឋអាមេរិកក៏កំពុងសិក្សាពីតម្រូវការ សម្រាប់ដូសជំរុញរបស់វ៉ាក់សាំង Johnson & Johnson ដែលចាក់តែមួយដូសផងដែរ។

យ៉ាងណាក្តី ការប្តេជ្ញាចិត្តជាផ្លូវការ ដែលចាត់ទុកថាវ៉ាក់សាំងដូស ៣ គឺជា “ការចាក់វ៉ាក់សាំងពេញលេញ” នឹងមានផលប៉ះពាល់យ៉ាងធំធេងចំពោះសាលារៀន អាជីវកម្មនិងអង្គភាពដទៃទៀតដែលមានអាណត្តិចាក់វ៉ាក់សាំង៕

ប្រែសម្រួល៖ Vann Vann

ប្រភព៖ PBS

ចុចអាន៖ ថ្មីៗ នេះ កុមារ អាមេរិក អត់ ទាន់ ចាក់ វ៉ាក់សាំង ឆ្លង កូវីដ ចូល ពេទ្យ កាន់ តែ ច្រើន