Hot News! ទីបំផុត បន្ទាយចុងក្រោយរបស់ចលនាតស៊ូ អាហ្វហ្គានីស្ថាន ធ្លាក់ទៅលើដៃ ក្រុមតាលីបង់ ហើយ

ក្រុមតាលីបង់បានក្ដោបក្ដាប់ខេត្ត Panjshir ដែលជាបន្ទាយចុងក្រោយនៃកងកម្លាំងប្រឆាំងតាលីបង់នៅក្នុងប្រទេសអាហ្វហ្គានីស្ថាន ។

វាជាខេត្តតែមួយគត់ដែលក្រុមតាលីបង់មិនដណ្តើមបាន ក្នុងអំឡុងពេលវាយលុករបស់ពួកគេកាលពីខែមុន ។

យោងតាមសាក្សីមកពីតំបន់នោះបាននិយាយក្នុងលក្ខខណ្ឌអនាមិក ដោយខ្លាចសុវត្ថិភាពរបស់ពួកគេថា ក្រុមយុទ្ធជនតាលីបង់រាប់ពាន់នាក់បានវាយលុកស្រុកចំនួន ៨ នៃខេត្ត Panjshir ។

ទន្ទឹមនោះ អ្នកនាំពាក្យតាលីបង់លោក Zabihullah Mujahid បានចេញសេចក្តីថ្លែងការណ៍មួយនៅថ្ងៃចន្ទនេះ ដោយនិយាយថា ឥឡូវនេះខេត្ត Panjshir ស្ថិតនៅក្រោមការគ្រប់គ្រងរបស់យុទ្ធជនតាលីបង់ ។

ស្របពេលជាមួយគ្នានេះ រូបភាពនៅលើបណ្តាញសង្គមក៏បានបង្ហាញដែរថា សមាជិកតាលីបង់ជាច្រើននាក់ឈរនៅមុខខ្លោងទ្វារនៃបរិវេណអភិបាលខេត្ត Panjshir ។

រហូតមកដល់ពេលនេះ មេដឹកនាំចលនាតស៊ូអាហ្វហ្គានីស្ថានលោក Ahmad Massoud មិនទាន់មានសេចក្ដីថ្លែងការណ៍ ពាក់ព័ន្ធនឹងបញ្ហាទាំងនេះនៅឡើយទេ ខណៈប្រភពព័ត៌មានមួយបានឲ្យដឹងថា លោកបានធ្វើដំណើរចាកចេញពីជ្រលងភ្នំមួយនេះហើយ ៕

ប្រែសម្រួលដោយ ៖ ជីវ័ន្ត

ប្រភព ៖ The Irish Times

ចុចអាន ៖ មេដឹកនាំចលនាតស៊ូ អាហ្វហ្គានីស្ថាន ថា បើ តាលីបង់ ចាកចេញពីខេត្តជ្រលងភ្នំ ការចរចាបញ្ឈប់ការប្រយុទ្ធគ្នានឹងកើតឡើង