វៀតណាម រឹបអូសថ្នាំ Lianhua Qingwen រត់ពន្ធខុសច្បាប់មកពីប្រទេស ចិន

ក្រុមឃ្លាំមើលទីផ្សារនៅខេត្ត Binh Duong ប្រទេសវៀតណាម បានរឹបអូសទំនិញវេជ្ជសាស្រ្តរត់ពន្ធខុសច្បាប់មកពីប្រទេសចិនជាច្រើនកញ្ចប់ ក្នុងនោះរួមមាន ឱសថព្យាបាលរោគសញ្ញាជំងឺកូវីដ-១៩  និងផលិតផលវេជ្ជសាស្រ្តផ្សេងទៀតផងដែរ។

នាយកដ្ឋានឃ្លាំមើលទីផ្សារវៀតណាម បានរាយការណ៍កាលពីថ្ងៃអាទិត្យថា ទំនិញដែលគួរឲ្យសង្ស័យនេះ ត្រូវបានរកឃើញកំឡុងការឆែកឆេរក្រុមហ៊ុន SH – XY Construction Technique Trading Co. Ltd.។

ទំនិញដែលរឹបអូសបានរួមមាន ថ្នាំគ្រាប់ Lianhua Qingwen ចំនួន១៩,៨៦០ប្រអប់ ឧបករណ៍ធ្វើតេស្តកូវីដរហ័សចំនួន៤៦០ ឧបករណ៍ការពារផ្នែកវេជ្ជសាស្រ្តចំនួន៤,៦០០ របាំងមុខចំនួន១,៦០០ ថ្នាំសម្លាប់មេរោគ៥១៦ដប ម៉ាសរាប់ពាន់និងរបស់ផ្សេងទៀត។

ផលិតផលទាំងនេះ ភាគច្រើនផលិតនៅប្រទេសចិនប៉ុន្តែពួកគេមិនមានបិទស្លាកសញ្ញាជាភាសាវៀតណាមទេ ហើយបានបង្ហាញពីសញ្ញានៃការនាំចូលខុសច្បាប់ពីប្រទេសចិន។

តំណាងរបស់ក្រុមហ៊ុន មិនបានបង្ហាញវិក្កយបត្រឬឯកសារផ្សេងទៀតដែលបញ្ជាក់ពីប្រភពដើមស្របច្បាប់នៃទំនិញដែលមានតម្លៃប្រមាណជាង ៧២៥ លានដុង (៣១,៨០០ ដុល្លារអាមេរិក) ទាំងនេះទេ។

នាយកដ្ឋានឃ្លាំមើលទីផ្សារខេត្ត កំពុងស៊ើបអង្កេតប្រភពនៃទំនិញទាំងនេះ ហើយឲ្យក្រុមហ៊ុនមកដោះស្រាយចំពោះការរំលោភបំពាន។

គួរកត់សម្គាល់ផងដែរថា ថ្មីៗនេះ Lianhua Qingwen ត្រូវបានផ្សព្វផ្សាយនៅលើបណ្តាញសង្គមថាជាឱសថបុរាណចិន ព្យាបាលអ្នកជំងឺកូវីដ-១៩៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ហេតុអ្វី អឺរ៉ុប ផ្តល់វ៉ាក់សាំងកូវីដឲ្យ វៀតណាម ច្រើនម្ល៉េះ?