តាលីបង់ ថា ស្រ្តីគួរនៅផ្ទះ ចាំតែសម្រាលកូនទៅ

អ្នកនាំពាក្យក្រុមតាលីបង់បានប្រកាសកាលពីថ្ងៃព្រហស្បតិ៍ថា គ្មានថ្ងៃស្ត្រីឡើងកាន់តំណែងជារដ្ឋមន្ត្រីនៅក្នុងជួររដ្ឋាភិបាលនេះបានឡើយ ព្រោះវាជាបន្ទុកមួយដែលពួកគេមិនអាចទ្រាំទ្របាន ហើយពួកគេគួរតែនៅផ្ទះចាំតែសម្រាលកូនទៅ។

នៅក្នុងបទសម្ភាសន៍ជាមួយសារព័ត៌មាន TOLO News អាហ្វហ្គានីស្ថាន អ្នកនាំពាក្យលោក Sayed Zekrullah Hashimi បានប្រកាសថា ក្រុមតាលីបង់មិនចាត់ទុកស្ត្រីជាពាក់កណ្តាលនៃសង្គមឡើយ ហើយថា ការអនុញ្ញាតឲ្យស្ត្រីម្នាក់ក្លាយជារដ្ឋមន្ត្រីក្នុងជួររដ្ឋាភិបាល ដូចជាដាក់អំរែកលើស្មារបស់ពួកគេអ៊ីចឹង។

វីដេអូនេះ បានបង្ហាញការសន្ទនារវាងលោក Hashimi និងអ្នកយកព័ត៌មាន TOLO News ដោយលោក Hashimi ប្រកាសថា “ស្ត្រីតវ៉ានៅតាមដងផ្លូវ មិនមែនជាស្ត្រីអាហ្វហ្គានីស្ថានទេ។ ស្ត្រីអាហ្វហ្គានីស្ថាន គឺជាអ្នកដែលផ្តល់កំណើតដល់ប្រជាជនអាហ្វហ្គានីស្ថាន និងអប់រំពួកគេអំពីក្រមសីលធម៌ឥស្លាម”។

ក្រុមយុទ្ធជនតាលីបង់ បានប្រឈមមុខនឹងការតវ៉ា ដឹកនាំដោយស្ត្រីកាលពីថ្ងៃពុធទី ៨ ខែកញ្ញា បន្ទាប់ពីពួកគេបានប្រកាសរដ្ឋាភិបាលបណ្តោះអាសន្នសុទ្ធតែជាបុរស គ្មានស្ត្រីសូម្បីម្នាក់ ហើយបន្ទាប់មកបានហាមឃាត់ស្ត្រីមិនឲ្យចូលរួមក្នុងការលេងកីឡាណាមួយឡើយ។

ក្រុមបាតុករដែលមានកំហឹង បានប្រមូលផ្តុំគ្នានៅតាមដងផ្លូវក្នុងរដ្ឋធានី ដើម្បីឆ្លើយតបទៅនឹងការសម្រេចចិត្តនេះ ហើយមានរូបភានៃការបង្ក្រាបយ៉ាងច្រើន បានលេចឡើងលើបណ្តាញសង្គម៕

វីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្រុមតាលីបង់ បាញ់គ្រាប់ពិតលើការតវ៉ា សម្លាប់បាតុករ ៤នាក់