ចិន ចំអក អាមេរិក ដោយបង្ហោះវីដេអូ ក្រុមតាលីបង់ យកយន្តហោះចងទោង ជិះលេង

មន្រ្តីរដ្ឋាភិបាលជាន់ខ្ពស់ចិនម្នាក់ បាននិយាយចំអកឡកឡឺយដល់អាមេរិក បន្ទាប់ពីសមាជិកក្រុមតាលីបង់ ត្រូវបានគេថតវីដេអូកំពុងជិះទោង ដែលចងភ្ជាប់ទៅនឹងយន្តហោះយោធាដែលគេបោះបង់ចោល។

លោក Lijian Zhao មន្រ្តីជាន់ខ្ពស់នៃក្រសួងការបរទេសចិនបាននិយាយចំអកដល់សហរដ្ឋអាមេរិក នៅក្នុងបណ្តាញ Twitter ដែលត្រូវបានគេមើលជាង ៧ ម៉ឺនដង។

លោក Zhao បានសរសេរថា “ផ្នូររបស់ចក្រភពនិងម៉ាស៊ីនសង្គ្រាមរបស់ពួកគេ។ ក្រុមតាលីបង់ បានប្រែក្លាយយន្តហោះរបស់ពួកគេទៅជាទោង និងប្រដាប់ក្មេងលេង។

វីដេអូនេះ បានបង្ហាញពីសមាជិកក្រុមតាលីបង់ យោលទោងពីស្លាបយន្តហោះយោធាដែលគេបោះបង់ចោល។

នៅប៉ុន្មានសប្តាហ៍មុនការដកទ័ពរបស់អាមេរិក កងទ័ពអាកាសអាហ្វហ្គានីស្ថានបានប្រតិបត្តិការយន្តហោះចំនួន ១៦៧ គ្រឿង ក្នុងនោះមានឧទ្ធម្ភាគចក្រ ១០៨ គ្រឿងនិងយន្តហោះ ៥៩ គ្រឿង។

យន្តហោះប្រមាណ ៤៦ គ្រឿងរួមទាំងឧទ្ធម្ភាគចក្រ ២៤ គ្រឿងផងដែរ បានហោះទៅកាន់ប្រទេសអ៊ូសបេគីស្ថាន មុនពេលក្រុមតាលីបង់ចូលកាន់កាប់។

មេបញ្ជាការបេសកកម្មជម្លៀសអាមេរិក លោកឧត្តមសេនីយ៍ Frank McKenzie បាននិយាយថា កងទ័ពរបស់គាត់បានបិទយន្តហោះចំនួន ៧៣ គ្រឿងលែងឲ្យដំណើរការបាន មុនពេលដកខ្លួនចេញពីប្រទេសកាលពីខែមុន។

ក្រុមតាលីបង់ ត្រូវបានគេជឿថា មានយន្តហោះសរុប ៤៨ គ្រឿង បើទោះបីជាគេមិនដឹងថាយន្តហោះទាំងនោះ អាចហោះហើរបានឬក៏រយៈពេលប៉ុន្មានដែលពួកគេនឹងអាចរក្សាប្រតិបត្តិការបានក៏ដោយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ តាលីបង់ ថា ស្រ្តីគួរនៅផ្ទះ ចាំតែសម្រាលកូនទៅ