មិនឲ្យចាញ់គ្នាឡើយ កូរ៉េខាងត្បូង បញ្ចេញសមត្ថភាពបាញ់មីស៊ីលផ្លោងចេញពីនាវាមុជទឹកឌឺ កូរ៉េខាងជើង វិញ

ការិយាល័យលោកប្រធានាធិបតី Moon Jae-in បានបញ្ជាក់ថា កូរ៉េខាងត្បូងបានសាកល្បងដោយជោគជ័យនូវមីស៊ីលផ្លោងបាញ់ចេញពីនាវាមុជទឹកនៅថ្ងៃទី ១៥ ខែកញ្ញានេះ ហើយបច្ចុប្បន្នប្រទេសនេះគឺជាប្រទេសទី ៧ នៅលើពិភពលោកដែលមានបច្ចេកវិទ្យាបែបនេះ ។

ទន្ទឹមនោះ សេតវិមានកូរ៉េខាងត្បូងបានបន្ថែមថា មីស៊ីលនេះត្រូវបានបាញ់ចេញពីក្រោមទឹកពីនាវាមុជទឹក Ahn Chang-ho ។ មីស៊ីលនេះអាចបាញ់ចំគោលដៅរបស់ខ្លួនដោយជោគជ័យនៅក្នុងការសាកល្បងនេះ ។

ស្របពេលជាមួយគ្នានេះ ការបាញ់សាកល្បងមីស៊ីលរបស់កូរ៉េខាងត្បូងក៏កើតឡើង ចំពេលដែលកូរ៉េខាងជើងបានបាញ់សាកល្បងមីស៊ីលផ្លោងចំនួន ២ គ្រាប់នៅព្រឹកថ្ងៃនេះ ដោយបាញ់ចំតំបន់មួយក្បែរសមុទ្រជប៉ុន ។

បន្ថែមពីនេះវាក៏កើតឡើង បន្ទាប់ពីសហរដ្ឋអាមេរិកកាលពីខែឧសភាបានដកការរឹតត្បិតរយៈពេល ៤២ ឆ្នាំលើកម្មវិធីអភិវឌ្ឍមីស៊ីលរបស់កូរ៉េខាងត្បូង ដោយអនុញ្ញាតឲ្យទីក្រុងសេអ៊ូលអភិវឌ្ឍមីស៊ីលផ្លោង ដែលអាចបាញ់ដល់គោលដៅឆ្ងាយពីឧបទ្វីបកូរ៉េ ។

ចំណែកនៅឆ្នាំ ២០១៧ លោកប្រធានាធិបតី Moon Jae-in និងអតីតប្រធានាធិបតីអាមេរិកលោក Donald Trump បានយល់ព្រមដកការកំណត់ទម្ងន់ក្បាលគ្រាប់មីស៊ីលផ្លោងរបស់កូរ៉េខាងត្បូង អំឡុងកិច្ចប្រជុំកំពូលទ្វេភាគី ខណៈក៏មានការពិនិត្យឡើងវិញមួយទៀតត្រូវបានធ្វើឡើងផងដែរនៅឆ្នាំ ២០២០ ដើម្បីអនុញ្ញាតឲ្យមានការអភិវឌ្ឍរ៉ុកកែតដើរដោយថាមពលឥន្ធនៈទៅកាន់អវកាស ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ទើបសាកល្បងជោគជ័យមីស៊ីលនាំផ្លូវចម្ងាយឆ្ងាយថ្មី ពេលនេះ កូរ៉េខាងជើង បាញ់មួយគ្រាប់ទៀត