ផ្ទុះបាតុកម្មហិង្សាប្រឆាំងការបិទខ្ទប់នៅទីក្រុងមែលប៊ន ប៉ូលិសចាប់ខ្លួនបាតុករជាង ២០០នាក់ (វីដេអូ)

មន្រ្តីប៉ូលិសជាច្រើននាក់ បានរងរបួស ហើយបាតុកររាប់រយនាក់ត្រូវបានចាប់ខ្លួន នៅក្នុងទីក្រុងដែលមានប្រជាជនច្រើនបំផុតលំដាប់ទី ២ របស់ប្រទេសអូស្រ្តាលីកាលពីថ្ងៃសៅរ៍ ក្នុងការប៉ះទង្គិចគ្នាដោយហិង្សានៅកន្លែងហែក្បួនប្រឆាំងការបិទខ្ទប់។

មន្រ្តីបានប្រើស្ព្រៃយ៍ និងចាប់ខ្លួនមនុស្សជាង ២០០នាក់នៅទីក្រុងមែលប៊ន ដោយសារអ្នកចូលរួមរាប់រយនាក់មិនគោរពតាមបទបញ្ជាស្នាក់នៅក្នុងផ្ទះ ហើយបានដើរពេញទីក្រុង។

ការប្រមូលផ្តុំខុសច្បាប់នេះ បានកើតឡើងចំពេលទីក្រុងត្រូវដាក់ក្នុងការបិទខ្ទប់ជាលើកទី ៦ ចាប់តាំងពីការរីករាលដាលនៃជំងឺរាតត្បាត បានផ្ទុះឡើង។

ប៉ូលិសនិយាយថា មន្រ្តី៦នាក់ ត្រូវបានបញ្ជូនទៅមន្ទីរពេទ្យបន្ទាប់ពីពួកគេរងគ្រោះដោយវត្ថុរឹង និងរត់ជាន់គ្នា នៅក្នុងការប៉ះទង្គិចជាមួយហ្វូងមនុស្សប្រហែល ៧០០ នាក់។

មេបញ្ជាការប៉ូលិសរដ្ឋ Victoria លោក Mark Galliott បានប្រាប់ប្រព័ន្ធផ្សព្វផ្សាយថា “អ្វីដែលយើងបានឃើញនៅថ្ងៃនេះ គឺជាក្រុមអ្នកតវ៉ាដែលបានមកជួបជុំគ្នា មិនមែនដើម្បីតវ៉ាប្រឆាំងនឹងសេរីភាពនោះទេ ប៉ុន្តែមកដើម្បីប្រឆាំងជាមួយប៉ូលិស”។

ប៉ូលិសបានព្យាយាមរារាំងបាតុករ មិនឲ្យចូលទៅកាន់កណ្តាលទីក្រុង ដោយបិទផ្លូវនិងបញ្ឈប់ការដឹកជញ្ជូនសាធារណៈ ក្នុងគោលបំណងបញ្ចៀសកុំឲ្យមានអំពើហិង្សាកើតឡើងម្តងទៀត។

ប៉ុន្តែក្រុមអ្នកហែក្បួន បានផ្លាស់ប្តូរទីតាំង ហើយមានវីដេអូមួយបង្ហាញពី ហ្វូងមនុស្សសម្រុកចូលក្នុងខ្សែត្រៀមរបស់ប៉ូលិសនៅពេល ការប៉ះទង្គិចគ្នាបានកើតឡើងនៅតាមផ្លូវរថភ្លើង៕

សូមទស្សនាវីដេអូខាងក្រោម

ប្រែសម្រួល៖ សន្យា

ប្រភព៖ AFP

ចុចអាន៖ អាមេរិក ព្រមព្រៀងកាត់បន្ថយកងកម្លាំងប្រយុទ្ធនៅ អ៊ីរ៉ាក់

ចុចអាន៖ អាហ្វហ្គានីស្ថាន បើកអនុវិទ្យាល័យឡើងវិញ តែមិនអនុញ្ញាតឲ្យសិស្សស្រីចូលរៀនឡើយ