រដ្ឋឥស្លាម បំផ្ទុះគ្រាប់បែកនៅ អាហ្វហ្គានីស្ថាន សម្លាប់ និងរបួស ក្រុមតាលីបង់ ច្រើននាក់

ទីភ្នាក់ងារព័ត៌មាន Amaaq របស់ក្រុមរដ្ឋឥស្លាមបាននិយាយនៅលើឆានែល Telegram របស់ខ្លួនកាលពីថ្ងៃអាទិត្យថា ក្រុមរដ្ឋឥស្លាមបានអះអាងទទួលខុសត្រូវចំពោះការវាយប្រហារបំផ្ទុះគ្រាប់បែកជាបន្តបន្ទាប់ នៅក្នុងទីក្រុង Jalalabad ភាគខាងកើតប្រទេសអាហ្វហ្គានីស្ថាន ។

ដោយសំដៅទៅការបំផ្ទុះគ្រាប់បែកកាលពីថ្ងៃសសៅរ៍ និងថ្ងៃអាទិត្យ ក្រុមរដ្ឋឥស្លាមបាននិយាយថា “សមាជិកក្រុមសកម្មប្រយុទ្ធតាលីបង់ជាង ៣៥ នាក់ត្រូវបានសម្លាប់ ឬរងរបួសនៅក្នុងការផ្ទុះជាបន្តបន្ទាប់នោះ” ។

ទន្ទឹមនោះ ក្រុមតាលីបង់មិនមានការអត្ថាធិប្បាយភ្លាមៗអំពីចំនួនអ្នកស្លាប់នោះទេ ។

ចំណែកប្រភព និងសាក្ស៊ីបានប្រាប់ Reuters កាលពីថ្ងៃសៅរ៍ថា មនុស្សយ៉ាងតិច ៣ នាក់បានស្លាប់ និងប្រហែល ២០ នាក់បានរងរបួសនៅក្នុងការផ្ទុះគ្រាប់បែកនៅទីក្រុង Jalalabad រដ្ឋធានីនៃខេត្ត Nanjarhar ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ តាលីបង់ ប្រគល់មាសសុទ្ធ និងលុយរាប់លានដុល្លារទៅឲ្យធនាគារកណ្តាល អាហ្វហ្គានីស្ថាន