ចិន អបអរការវិលត្រឡប់របស់លោកស្រី Meng Wanzhou ជាជ័យជម្នះដ៏ធំធេងផ្នែកការទូត

សម្រាប់ទីក្រុងប៉េកាំង ការវិលត្រឡប់របស់លោកស្រី Meng Wanzhou នាយកប្រតិបត្តិក្រុមហ៊ុន Huawei មកកាន់ប្រទេសចិនវិញ បន្ទាប់ពីការធ្វើបត្យាប័នជាយូរមកហើយជាមួយសហរដ្ឋអាមេរិក ត្រូវបានអបអរ និងចាត់ទុកជាជ័យជម្នះដ៏ធំធេង ។

ចាប់ពីពេលដែលយន្តហោះពិសេសរបស់រដ្ឋាភិបាលចិនដែលដឹកលោកស្រី Meng បានចាកចេញពីប្រទេសកាណាដា ជាកន្លែងដែលប្រធានផ្នែកហិរញ្ញវត្ថុ (CFO) រូបនេះបានចំណាយពេលជិត ៣ ឆ្នាំរស់នៅក្រោមការឃុំខ្លួនក្នុងផ្ទះនៅក្នុងវិមានដែលមានទឹកប្រាក់រាប់ពាន់លានដុល្លាររបស់លោកស្រី ការធ្វើដំណើរមកស្រុកកំណើតវិញនេះបានក្លាយទៅជាការឃោសនាបែបជាតិនិយមពេញទី ។

ទន្ទឹមនោះ កម្រាលព្រំក្រហម និងហ្វូងមនុស្សដែលគ្រវីទង់ជាតិចិនបានរង់ចាំលោកស្រីនៅលើកម្រាលព្រំនៅទីក្រុង Shenzhen ភាគខាងត្បូង ហើយក៏ជាទីស្នាក់ការកណ្តាលរបស់ក្រុមហ៊ុនបច្ចេកវិទ្យាយក្ស Huawei ផងដែរ ។

បន្ថែមពីនេះ ពាក្យស្លោកស្នេហាជាតិ និងចម្រៀងបានបន្លឺឡើងនៅសាលមកដល់របស់ព្រលានយន្តហោះ ខណៈអគារខ្ពស់កប់ពពកនៅតាមទីក្រុងក៏បានបំភ្លឺភ្លើងស្វាគមន៍ការមកដល់ស្រុកកំណើតរបស់លោកស្រីវិញផងដែរ ។

ព្រឹត្តិការណ៍នេះក៏ត្រូវបានផ្សាយបន្តផ្ទាល់ដោយប្រព័ន្ធផ្សព្វផ្សាយរដ្ឋផងដែរ ខណៈការផ្សាយផ្ទាល់តាមអ៊ីនធឺណិតដោយទូរទស្សន៍ CCTV បានបន្តរហូតដល់រយៈពេល ៦ ម៉ោង ហើយទាក់ទាញអ្នកទស្សនាជាង ៨៣ លាននាក់ ។

ចំនួននេះគឺច្រើនជាងទ្វេដងនៃការទស្សនាចំនួន ៣៨ លានដងនៃការបាញ់បង្ហោះបេសកកម្មយានអវកាសមិនមានមនុស្សបើករបស់ប្រទេសចិន ដើម្បីបញ្ជូនអវកាសយានិក ៣ នាក់ទៅកាន់ទីអវកាសនៅខែមិថុនា ។

ស្របពេលជាមួយគ្នានេះលោកស្រី Meng បានសរសេរនៅក្នុងបណ្តាញទំនាក់ទំនងសង្គម អំឡុងពេលហោះហើររបស់លោកស្រីថា “បើគ្មានមាតុភូមិដ៏ខ្លាំងក្លាមួយនេះទេ ខ្ញុំនឹងមិនមានសេរីភាពទេនៅថ្ងៃនេះ” ។

សម្រាប់ទស្សនិកជនក្នុងស្រុកវិញ ការវិលត្រឡប់របស់លោកស្រី Meng ត្រូវបានគេកំណត់ថាជារឿងរ៉ាវនៃជ័យជម្នះផ្នែកការទូតរបស់ចិន និងជាសញ្ញានៃការរីកលូតលាស់នយោបាយរបស់ខ្លួន ។

យោងតាមរឿងរ៉ាវកន្លងមកនោះ លោកស្រី Meng គឺជាជនរងគ្រោះដោយគ្មានកំហុសនៃ “ការធ្វើទុក្ខបុកម្នេញផ្នែកនយោបាយ” ដោយសហរដ្ឋអាមេរិកដើម្បីកម្ទេចឧស្សាហកម្មបច្ចេកវិទ្យាកំពូលៗរបស់ចិន ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ វ៉ាក់សាំងចាក់តែមួយដូសរបស់ ចិន ល្អខ្លាំងសម្រាប់កុមារអាយុពី ៦ ដល់ ១៧ ឆ្នាំ