អាមេរិក សាកល្បងជោគជ័យ មីស៊ីលល្បឿនលឿនជាងសំឡេងដល់ទៅ ៥ដង

យោធាអាមេរិកបាននិយាយថា ខ្លួនបានសាកល្បងដោយជោគជ័យ នូវអាវុធដែលមានល្បឿនលឿនជាងសំឡេងរហូតដល់ទៅ ៥ ដងឯណោះ។

មន្ទីរបញ្ចកោណបាននិយាយកាលពីថ្ងៃចន្ទថា ការធ្វើតេស្តដែលកើតឡើងកាលពីសប្តាហ៍មុន គឺជាការសាកល្បងដោយជោគជ័យលើកដំបូង នៃអាវុធល្បឿនលឿនជាងសំឡេង HAWC ចាប់តាំងពីឆ្នាំ២០១៣មក។

ទីភ្នាក់ងារស្រាវជ្រាវគម្រោងទំនើបផ្នែកការពារជាតិ (DARPA) បាននិយាយនៅក្នុងសេចក្តីថ្លែងការណ៍មួយថា មីស៊ីលដែលត្រូវបានផលិតដោយក្រុមហ៊ុន Raytheon ត្រូវបានបាញ់ចេញពីយន្តហោះ ត្រឹមតែប៉ុន្មានវិនាទីប៉ុណ្ណោះ មុនពេលម៉ាស៊ីនពីទីភ្នាក់ងារ Northrop Grumman បានចាប់ផ្តើម។

ម៉ាស៊ីននេះ ដំណើរការដោយការបង្ហាប់ខ្យល់ចូលជាមួយឥន្ធនៈអ៊ីដ្រូកាបូន ដើម្បីបង្កើតល្បាយលំហូរខ្យល់ ដែលមានល្បឿនឈានដល់ជាង ១,៧០០ ម៉ែត្រក្នុងមួយវិនាទីឬ ៥ ដងនៃល្បឿនសំឡេង។

គួរបញ្ជាក់ថា អាមេរិក រុស្ស៊ីនិងចិន មានកម្មវិធីកាំជ្រួចមីស៊ីលល្បឿនលឿនជាងសំឡេង ហើយរុស្ស៊ីនិងចិន កំពុងនាំមុខអាមេរិក។ នេះបើតាមការអះអាងពីក្រុមអ្នកជំនាញ។

កាលពីខែឧសភា ប្រទេសរុស្ស៊ីនិយាយថា ខ្លួនបានសាកល្បងមីស៊ីលល្បឿនលឿនជាងសំឡេង Satan 2 ដែលអ្នកខ្លះនិយាយថា អាចកម្ទេចតំបន់ដែលមានទំហំប៉ុនប្រទេសអង់គ្លេស និងវែលស៍។

ពីរខែក្រោយមក រុស្ស៊ីបានសាកល្បងដោយជោគជ័យនូវមីស៊ីល Zircon ដែលលោកប្រធានាធិបតី វ្ល៉ាឌីមៀរ ពូទីន អួតថា អាចវាយប្រហារគ្រប់ទីកន្លែងនិងគេចផុតខែលការពារអាមេរិក។

ផ្ទុយទៅវិញ ប្រទេសចិនកំពុងស្ថិតនៅក្នុងដំណាក់កាលនៃការអភិវឌ្ឍន៍ នូវកម្លាំងនុយក្លេអ៊ែររបស់ខ្លួន ដែលមានទាំងមីស៊ីលនុយក្លេអ៊ែរល្បឿនលឿនជាងសំឡេង ក៏ដូចជាមីស៊ីលផ្លោងអន្តរទ្វីបកាន់តែទំនើបផងដែរ។

កាលពីខែតុលា ប្រទេសចិនបានដាក់ពង្រាយមីស៊ីលល្បឿនលឿនជាងសំឡេងទំនើបបំផុតរបស់ខ្លួនឈ្មោះ DF 17 ទៅកាន់តំបន់ឆ្នេរ ដើម្បីត្រៀមសម្រាប់ការលុកលុយកោះតៃវ៉ាន់៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ កូរ៉េខាងជើង បាញ់មីស៊ីលផ្លោងមួយគ្រាប់ចូលសមុទ្រ ជប៉ុន មួយភ្លែតមុនប្រេសិតខ្លួនថ្លែងទៅមហាសន្និបាត UN