ជំនន់ទឹកភ្លៀងដែលវាយប្រហារស្ទើរពាក់កណ្ដាលខេត្តប្រទេស ថៃ ពេលនេះមានអ្នកស្លាប់ និងបាត់ខ្លួន

ទឹកជំនន់ដែលបង្កឡើងដោយព្យុះត្រូពិច Dianmu បានជះឥទ្ធិពលដល់ស្ទើរតែពាក់កណ្តាលនៃខេត្តរបស់ប្រទេសថៃ ហើយពេលនេះបណ្តាលឲ្យមនុស្សយ៉ាងតិច ៦ នាក់ស្លាប់ និង ២ នាក់ទៀតបាត់ខ្លួន ។

នាយកដ្ឋានគ្រប់គ្រង និងកាត់បន្ថយគ្រោះមហន្តរាយថៃ (DDPM) បាននិយាយនៅក្នុងសេចក្តីថ្លែងការណ៍មួយថា ភ្លៀងធ្លាក់ខ្លាំងបាននាំឲ្យមានទឹកជំនន់នៅក្នុងខេត្តចំនួន ៣០ នៅភាគកណ្តាល ភាគខាងជើង និងភាគឦសានប្រទេសថៃ ហើយបានប៉ះពាល់ដល់ប្រជាពលរដ្ឋជាង ៧ ម៉ឺនគ្រួសារ ។

DDPM បាននិយាយថា ក្នុងនោះស្ថានភាពទឹកជំនន់នៅក្នុងខេត្តចំនួន ៧ ផ្សេងទៀតមានភាពប្រសើរឡើងវិញហើយផងដែរ ប៉ុន្តែនៅតែធ្ងន់ធ្ងរនៅក្នុងខេត្តចំនួន ២៣ ផ្សេងទៀត ។

ទន្ទឹមនោះ យោងតាមការព្យាករណ៍អាកាសធាតុបានឲ្យដឹងថា ភ្លៀងនឹងបន្តធ្លាក់មកលើតំបន់ភាគខាងជើង ភាគកណ្តាល និងភាគឦសានប្រទេសក្នុងរយៈពេល ៣ ថ្ងៃខាងមុខនេះទៀត ។

ជាចុងក្រោយ DDPM បាននិយាយថា ខ្លួននឹងបន្តតាមដានស្ថានការណ៍នេះ ហើយបានជំរុញឲ្យអាជ្ញាធរមូលដ្ឋានប្រុងប្រយ័ត្នចំពោះការរអិលបាក់ដី ឬគ្រោះធម្មជាតិផ្សេងៗដែលអាចកើតមានដោយយថាហេតុ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ភូកេត ប្រើវិធីថ្មីចាក់វ៉ាក់សាំងចូលក្រោមស្បែក លែងចាក់តាមសាច់ដុំ ប្រសិទ្ធភាពរឹតតែខ្ពស់