កូវីដ រាលដាលក្នុងពន្ធនាគារម៉ាឡេស៊ី មានអ្នកឆ្លងដល់ទៅជាង ៥ម៉ឺនករណី 

ជំងឺកូវីដ-១៩ បានបន្តរីករាលដាលនៅក្នុងពន្ធនាគារម៉ាឡេស៊ី ដោយការឆ្លងជាង ៥១,០០០ ករណី ត្រូវបានរាយការណ៍ចាប់តាំងពីឆ្នាំមុនមក។ មូលហេតុចម្បង គឺដោយសារតែពន្ធនាគារមានមនុស្សច្រើនពេក។

ចាប់តាំងពីឆ្នាំមុនមក ស្ថានភាពនៃការផ្ទុះឡើងនៃជំងឺកូវីដ នៅក្នុងពន្ធនាគារម៉ាឡេស៊ី នៅតែជាក្តីព្រួយបារម្ភ។ ចំនួនសរុបនៃការឆ្លងក្នុងពន្ធនាគារ បានឈានដល់ ៥១,១២៣ ករណី ក្នុងនោះរួមមានអ្នកទោស បុគ្គលិកពន្ធនាគារនិងក្រុមគ្រួសាររបស់ពួកគេ ព្រមទាំងទារក៩នាក់ ដែលកើតក្នុងពន្ធនាគារ។

នៅពេលនេះ ក្រុមប្រឹក្សាម៉ាឡេស៊ី កំពុងពន្លឿនកិច្ចពិភាក្សា អំពីវិធីនិងផែនការដើម្បីដោះស្រាយការផ្ទុះឡើងនៃជំងឺកូវីដ-១៩។ ប៉ុន្តែអ្វីដែលជារឿងបន្ទាន់នៅក្នុងពន្ធនាគារ គឺត្រូវពន្លឿនការចាក់ថ្នាំបង្ការដល់អ្នកទោស។

ឧបសគ្គចម្បងក្នុងការគ្រប់គ្រងការផ្ទុះឡើងនេះ គឺចំនួនអ្នកទោសច្រើនហួសហេតុ។ បច្ចុប្បន្នមានអ្នកទោសចំនួន ៦៩,៥០៧ នាក់នៅក្នុងពន្ធនាគារ ពោលគឺលើសពីសមត្ថភាពផ្ទុករបស់ពន្ធនាគារប្រហែល១៣,៥ភាគរយ។

លោកវេជ្ជបណ្ឌិត Ismail Mohammed អនុរដ្ឋមន្រ្តីក្រសួងមហាផ្ទៃបាននិយាយថា អាជ្ញាធរកំពុងធ្វើការដើម្បីកាត់បន្ថយការកកកុញនៅក្នុងពន្ធនាគារ ជាមួយនឹងការផ្ទេរអ្នកទោសទៅពន្ធនាគារផ្សេងទៀតដែលមានកន្លែងទំនេរ ប្រែក្លាយជំរំបណ្តុះបណ្តាលទៅជាពន្ធនាគារចល័ត រួមទាំងការបង្កើតមណ្ឌលនៅក្នុងពន្ធនាគារដើម្បីបំបែកអ្នកទោស ក្នុងករណីដែលជិតផុតទោសឬមានទោសស្រាល៕

ប្រែសម្រួល៖ Vann Vann

ប្រភព៖ Thairath

ចុចអាន៖ ក្រុមគ្រឿងញៀន អុកឡុកក្នុងពន្ធនាគារ អេក្វាទ័រ ស្លាប់មនុស្សជាង ១០០នាក់