ចិន ពិចារណាចាក់វ៉ាក់សាំងកូវីដដូសទី ៣ ដល់ក្រុមមនុស្សសំខាន់ៗ

មន្ត្រីម្នាក់មកពីអាជ្ញាធរសុខាភិបាលបានប្រកាសកាលពីថ្ងៃពុធថា គណៈកម្មការសុខភាពជាតិរបស់ចិន (NHC) កំពុងបង្កើតគោលនយោបាយ និងវិធានការសម្រាប់ការចាក់វ៉ាក់សាំងការពារជំងឺកូវីដ ១៩ ដូសជំរុញ ឬដូសទី ៣ ។

លោក Cui Gang មន្រ្តីមកពី NHC បាននិយាយនៅក្នុងសន្និសីទសារព័ត៌មានមួយកាលពីថ្ងៃពុធថា ប្រទេសចិនបានរៀបចំអ្នកជំនាញដើម្បីធ្វើការសិក្សាស្រាវជ្រាវទ្រង់ទ្រាយធំលើការចាក់ដូសទី ៣ នេះ ហើយនឹងផ្ដល់អាទិភាពលើក្រុមមនុស្សសំខាន់ៗដែលបានចាក់វ៉ាក់សាំងពេញ ២ ដូសបាន ៦ ខែ ។

លោកបាននិយាយថា ក្រុមមនុស្សសំខាន់ៗទាំងនោះរួមមាន អ្នកដែលធ្វើការនៅព្រលានយន្តហោះ កំពង់ផែ គយ មន្ទីរពេទ្យ និងមណ្ឌលសុខភាព ក៏ដូចជាមនុស្សចាស់ដែលមានអាយុ ៦០ ឆ្នាំឡើងទៅ ។

ចំណែកពេលវេលាដែលប្រទេសចិននឹងផ្តល់ភ្លើងខៀវសម្រាប់ការចាក់ដូសទី ៣ ដល់ប្រជាជនទូទៅ អ្នកជំនាញវ៉ាក់សាំងជាន់ខ្ពស់មកពីមជ្ឈមណ្ឌលគ្រប់គ្រង និងបង្ការជំងឺចិន (CCDC) បានបង្ហាញប្រាប់ Global Times ថា ការចាក់វ៉ាក់សាំងទ្រង់ទ្រាយធំមិនទាន់ត្រូវបានសម្រេចចិត្តនៅឡើយទេ ។

ទន្ទឹមនោះ អ្នកជំនាញបាននិយាយថា ប្រទេសចិននឹងសិក្សាពីសុវត្ថិភាពនៃដំណើរការនេះ ហើយទិន្នន័យមួយចំនួនធំនឹងទទួលបាន មុនពេលអ្នកជំនាញវ៉ាក់សាំងអាចវាយតម្លៃថាតើ ការចាក់វ៉ាក់សាំងដូសទី ៣ ទ្រង់ទ្រាយធំពិតជាត្រូវការចាំបាច់ឬក៏យ៉ាងណានោះ ៕

ប្រែសម្រួលដោយ ៖ ជីវ័ន្ត

ប្រភព ៖ Global Times

ចុចអាន ៖ វ៉ាក់សាំងចាក់តែមួយដូសរបស់ ចិន ល្អខ្លាំងសម្រាប់កុមារអាយុពី ៦ ដល់ ១៧ ឆ្នាំ