រុស្ស៊ីផ្ដល់វ៉ាក់សាំងកូវីដទៅមន្ទីរពេទ្យក្នុងប្រទេសចាក់លើពលរដ្ឋ កាលពីសប្តាហ៍មុន

ប្រទេសរុស្ស៊ីបានផ្តល់វ៉ាក់សាំង Sputnik V សម្រាប់ការប្រើប្រាស់លើពលរដ្ឋដល់មន្ទីរពេទ្យនៅភាគខាងត្បូងនៃទីក្រុងម៉ូស្គូ ហើយបាននិយាយកាលពីថ្ងៃចន្ទ ទី៣០ ខែវិច្ឆិកា ថា ខ្លួនបានចាប់ផ្តើមចាក់វ៉ាក់សាំងដល់ប្រជាជនក្នុងតំបន់កាលពីសប្តាហ៍មុន ។

ប្រទេសរុស្ស៊ីដែលកំពុងប្រញាប់ប្រញាល់បន្តសហការណ៍ជាមួយក្រុមហ៊ុនផលិតឱសថលោកខាងលិចក្នុងការប្រជែងនឹងការចាក់វ៉ាក់សាំងប្រឆាំងជំងឺកូវីដ ១៩ បាននិយាយថា លទ្ធផលនៃការសាកល្បងព្យាបាលបណ្តោះអាសន្នបង្ហាញថា វ៉ាក់សាំង Sputnik V របស់ខ្លួនមានប្រសិទ្ធភាព ៩២ ភាគរយក្នុងការការពារមនុស្សពីការឆ្លងជំងឺកូវីដ ១៩ ។

មន្ទីរពេទ្យកណ្តាលរបស់ទីក្រុង Domodedovo បាននិយាយនៅលើគេហទំព័ររបស់ខ្លួនថា ប្រជាជនដែលចង់ចាក់វ៉ាក់សាំងត្រូវតែចុះឈ្មោះនៅលើគេហទំព័ររដ្ឋាភិបាលជាមុន និងនាំមកនូវលទ្ធផលនៃការធ្វើតេស្តអវិជ្ជមានជំងឺកូវីដ ១៩ និងអត្តសញ្ញាណប័ណ្ណនៅថ្ងៃនោះ ។

ករណីឆ្លងជំងឺកូវីដ ១៩ បានកើនឡើងនៅក្នុងប្រទេសរុស្ស៊ីចាប់តាំងពីខែកញ្ញា ប៉ុន្តែអាជ្ញាធរបានប្រឆាំងនឹងការដាក់ការបិទប្រទេសតឹងតែង ហើយបាននិយាយថា វិធានការគោលដៅគឺគ្រប់គ្រាន់ដើម្បីទប់ទល់នឹងវិបត្តិនេះ ។

អាជ្ញាធរបានបញ្ជាក់ពីករណីឆ្លងថ្មីចំនួន ២៦,៣៣៨ ករណីកាលពីថ្ងៃចន្ទ រួមមាន ៦,៥១១ ករណីនៅទីក្រុងម៉ូស្គូ និង ៣,៦៩១ នាក់នៅទីក្រុង St Petersburg ដែលបានធ្វើឲ្យចំនួនឆ្លងទូទាំងប្រទេសសរុបដល់ ២,២៩៥,៦៥៤ ករណីចាប់តាំងពីរោគរាតត្បាតចាប់ផ្ដើម ។

អាជ្ញាធរក៏បានរាយការណ៍ថាមានអ្នកស្លាប់ចំនួន ៣៦៨ នាក់ផងដែរក្នុងរយៈពេល ២៤ ម៉ោងចុងក្រោយនេះដែលធ្វើឲ្យចំនួនអ្នកស្លាប់ផ្លូវការកើនដល់ ៣៩,៨៩៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ក្រុមហ៊ុន Sputnik V បញ្ចុះបញ្ចូលឲ្យក្រុមហ៊ុន AstraZeneca រួមវ៉ាក់សាំងកូវីដជាមួយគ្នា

ចុចអាន ៖ វីដេអូលោក ពូទីន ក្អកខ្លាំងៗក្នុងកិច្ចប្រជុំ ធ្វើឲ្យគេបារម្ភថា គាត់ឆ្លងកូវីដ