ឥណ្ឌាសាងសង់ស្ពានដើម្បីជួយសត្វល្មូនឆ្លងផ្លូវ

មន្រ្តីព្រៃឈើបានសាងសង់ស្ពានពិសេសមួយសម្រាប់សត្វល្មូន និងសត្វតូចៗដទៃទៀតដើម្បីឆ្លងកាត់ផ្លូវដ៏មមាញឹកមួយនៅរដ្ឋ Uttarakhand ប្រទេសឥណ្ឌា ។

ប្រព័ន្ធផ្សព្វផ្សាយក្នុងស្រុកបាននិយាយថា ស្ពានឈ្មោះ “Eco Bridge” ដែលមានកម្ពស់ ២៧ ម៉ែត្រធ្វើពីឫស្សី ដើមក្រចៅ និងស្មៅគឺជាប្រភេទស្ពានដែលមិនធ្លាប់មានដំបូងបង្អស់របស់ឥណ្ឌា ។

សត្វពាហនៈជាច្រើនត្រូវបានរត់ឆ្លងកាត់មុខរថយន្តលឿនៗនៅលើផ្លូវនេះដែលធ្វើដំណើរទៅកាន់តំបន់ភ្នំ Nainital ដែលជាគោលដៅទេសចរណ៍ដ៏ពេញនិយមនៅក្នុងរដ្ឋ ។ ឥឡូវនេះមន្រ្តីកំពុងដាំរុក្ខជាតិវល្លិ និងស្មៅដើម្បីទាក់ទាញសត្វទៅស្ពាននេះ ។

លោក Chander Shekhar Joshi មន្ត្រីព្រៃឈើក្នុងរដ្ឋបានប្រាប់ BBC ថា “សត្វល្មូន និងសត្វតូចៗជាច្រើនទៀតត្រូវបានសម្លាប់ដោយរថយន្តទេសចរណ៍នៅលើផ្លូវល្បឿនលឿននេះ” ។ លោកបន្តថា ក្រុមមន្រ្តីក៏បានបំពាក់កាម៉េរានៅសងខាងស្ពានដើម្បីឃ្លាំមើលចលនារបស់សត្វផងដែរ ។

បច្ចុប្បន្នស្ពាននេះបានក្លាយជាកន្លែងទាក់ទាញភ្ញៀវទេសចរដោយមានមនុស្សជាច្រើនដែលឆ្លងកាត់ផ្លូវនេះបានឈប់ថតរូប និងថតស៊ែហ្វី ។ ប៉ុន្តែមន្ទីរព្រៃឈើសង្ឃឹមថា វានឹងចាប់ផ្តើមទាក់ទាញសត្វឆាប់ៗនេះផងដែរ ។

មន្ត្រីព្រៃឈើបានប្រាប់កាសែត Indian Express ថា “នេះគឺជាព្រៃក្រាស់ ហើយដំរី ខ្លារខិន សត្វក្តាន់ និងសត្វគោផ្លាស់ទីនៅក្នុងតំបន់នេះ ។ អ្នកបើកបរអាចមើលឃើញពួកវាពីចម្ងាយខ្លះ ហើយបន្ថយល្បឿន ឬឈប់ ប៉ុន្តែពួកគេកម្រធ្វើវាណាស់សម្រាប់សត្វពស់ ថ្លែន បង្គួយ ត្រកួត ឬសត្វកំប្រុកជាដើម” ។

ទន្ទឹមនោះក្រុមមន្រ្តីក៏សង្ឃឹមផងដែរថា ស្ពាននេះនឹងជួយបង្កើតការយល់ដឹងជុំវិញសត្វតូចៗ និងសត្វល្មូននៅក្នុងតំបន់ក៏ដូចជាជួយការពារវាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ ឆេះមន្ទីរពេទ្យនៅឥណ្ឌា ស្លាប់អ្នកជំងឺកូវីដ ៥ នាក់

ចុចអាន ៖ ឥណ្ឌាចាប់ផ្តើមរាយការណ៍អំពីការស្លាប់ដោយសារព្យុះស៊ីក្លូន Nivar