ចិន ផ្ទុះកំហឹងលើ អាមេរិក ក្រោយដាក់ពង្រាយកងទ័ពដោយសម្ងាត់នៅ តៃវ៉ាន់

កាសែត The Wall Street Journal បានរាយការណ៍ថា អង្គភាពតូចមួយនៃកងកម្លាំងពិសេសរបស់សហរដ្ឋអាមេរិកបានឈរជើងដោយសម្ងាត់នៅតៃវ៉ាន់យ៉ាងហោចណាស់ ១ ឆ្នាំដើម្បីបណ្តុះបណ្តាលកងកម្លាំងយោធាក្នុងតំបន់ ។

ការរាយការណ៍នេះបានធ្វើឲ្យចិនមានការខឹងសម្បារយ៉ាងខ្លាំង ហើយនិពន្ធនាយកនៃសារព័ត៌មាន Global Times របស់ចិនបានយកបញ្ហានេះតិះដៀលអាមេរិកនៅលើបណ្ដាញ Twiiter ថា “ហេតុអ្វីវាសម្ងាត់? បញ្ជូនទាហាន ២៤០ នាក់ជាសាធារណៈក្នុងឯកសណ្ឋានយោធាអាមេរិក ហើយប្រកាសជាសាធារណៈនៅកន្លែងដែលពួកគេឈរជើងទៀត” ។

ការបង្ហោះនោះបានបន្ថែមទៀតថា “តើកងទ័ពរំដោះប្រជាជនចិន (PLA) នឹងធ្វើការវាយប្រហារតាមអាកាសឲ្យចំគោលដៅដើម្បីកម្ចាត់ពួកឈ្លានពានអាមេរិកទាំងនោះឬយ៉ាងណា!” ។

ទន្ទឹមនោះ ទីក្រុងប៉េកាំងបានបង្ហាញថា ខ្លួននឹងសងសឹកយ៉ាងឆាប់រហ័ស និងភ្លាមៗចំពោះការបង្ហាញណាមួយដែលថា អាមេរិកបានដាក់ពង្រាយកងកម្លាំងយោធាទៅកាន់កោះតៃវ៉ាន់ ដែលខ្លួនអះអាងថាជាទឹកដីរបស់ចិន ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ នាវាមុជទឹកអាមេរិក ជួបហេតុការណ៍ភ្ញាក់ផ្អើល នៅសមុទ្រចិនខាងត្បូង