ចិនព្រមានផ្ទុះសង្គ្រាមលោកលើកទី៣ តៃវ៉ាន់ប្តេជ្ញាមិនឱនក្បាល

ប្រទេសចិនបានព្រមានថា សង្គ្រាមលោកលើកទី ៣ អាចផ្ទុះឡើងគ្រប់ពេល បន្ទាប់ពីខ្លួនបានបញ្ជូនយន្តហោះចម្បាំងរាប់សិបគ្រឿង ចូលទៅក្នុងដែនអាកាសរបស់កោះតៃវ៉ាន់។

អត្ថបទមួយនៅក្នុងកាសែត Global Times ដែលគាំទ្រដោយរដ្ឋកាលពីថ្ងៃអង្គារសប្តាហ៍មុន បាននិយាយថា “ការឃុបឃិតគ្នា” រវាងអាមេរិកនិងតៃវ៉ាន់ គឺមានជារឿងព្រហើន ដែលធ្វើឲ្យស្ថានការណ៍កាន់តែយ៉ាប់យ៉ឺន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែតនេះអះអាងថា ប្រជាជនចិន បានត្រៀមខ្លួនរួចជាស្រេចក្នុងការធ្វើសង្រ្គាមជាមួយអាមេរិក ហើយព្រមានកោះតៃវ៉ាន់កុំឲ្យលេងជាមួយភ្លើង។

យន្តហោះចម្បាំងចិនជិត ១៥០ គ្រឿង បានរំលោភដែនអាកាសតៃវ៉ាន់ចាប់តាំងពីថ្ងៃសុក្រសប្តាហ៍មុនមក រួមទាំងយន្តហោះ ៥៦ គ្រឿងកាលពីថ្ងៃចន្ទផងដែរ ដែលជាការឈ្លានពានកាន់តែខ្លាំងឡើងរបស់ចិន ប្រឆាំងនឹងកោះលទ្ធិប្រជាធិបតេយ្យ ដែលគ្រប់គ្រងដោយខ្លួនឯង។

ស្របពេលជាមួយគ្នានោះដែរ ប្រធានាធិបតីអាមេរិកលោក Joe Biden បានឲ្យដឹងថា លោកបាននិយាយជាមួយប្រធានាធិបតីចិនលោក Xi Jinping អំពីបញ្ហាកោះតៃវ៉ាន់ ហើយមេដឹកនាំទាំងពីរ បានយល់ព្រមគោរពតាមកិច្ចព្រមព្រៀងកោះតៃវ៉ាន់ ខណៈភាពតានតឹងនៅតែបន្តកើនឡើង​ រវាងទីក្រុងតៃប៉ិនិងប៉េកាំង។

ទោះបីជាយ៉ាងណាក៏ដោយ ប្រធានាធិបតីតៃវ៉ាន់ លោកស្រី Tsai Ing-wen បាននិយាយនៅក្នុងសុន្ទរកថាដ៏ផ្គើនមួយ ចំពេលស្ថានការណ៍កាន់តែតានតឹងថា តៃវ៉ាន់ នឹងមិនឱនក្បាលចំពោះសម្ពាធពី ចិន ឡើយហើយនឹងការពារជីវិតរស់នៅតាមបែបប្រជាធិបតេយ្យរបស់ខ្លួន។

ប្រទេសចិន បានថ្កោលទោសសុន្ទរកថារបស់លោកស្រី Tsai ដោយនិយាយថា វាញុះញង់ឲ្យមានការប្រឈមមុខដាក់គ្នា។

គួរបញ្ជាក់ថា តៃវ៉ាន់ បានចាត់ទុកខ្លួនថាជារដ្ឋអធិបតេយ្យ ខណៈចិនចាត់ទុកកោះនេះថាជាខេត្តបំបែកខ្លួន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អាមេរិក ព្រមាន ចិន ឲ្យឈប់រករឿង តៃវ៉ាន់