កូរ៉េខាងជើង ចោទ ទីក្រុងវ៉ាស៊ីនតោន កំពុងបង្កើនភាពតានតឹង និងចង់បង្កសង្គ្រាមនៅឧបទ្វីបកូរ៉េ

ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃអង្គារនេះថា លោក គីម ជុងអ៊ុន មេដឹកនាំកំពូលនៃប្រទេសកូរ៉េខាងជើងបាននិយាយថា គ្មានមូលដ្ឋានណាមួយជឿសហរដ្ឋអាមេរិកមិនមែនជាសត្រូវជាមួយទីក្រុងព្យុងយ៉ាងនោះទេ ។

ទន្ទឹមនោះ លោក គីម ជុងអ៊ុន ក៏បានចោទប្រកាន់ទីក្រុងវ៉ាស៊ីនតោនផងដែរថា កំពុងបង្កើនភាពតានតឹង និងចង់បង្កសង្គ្រាមនៅឧបទ្វីបកូរ៉េ ។

នៅក្នុងសុន្ទរកថាមួយនៅឯពិព័រណ៍អភិវឌ្ឍន៍ការពារជាតិដើម្បីប្រារព្ធខួបលើកទី ៧៦ នៃការបង្កើតគណបក្សពលករកំពុងកាន់អំណាច (WPK) កាលពីថ្ងៃអាទិត្យ លោក គីម បាននិយាយថា ការអភិវឌ្ឍអាវុធរបស់កូរ៉េខាងជើងគឺស្ថិតនៅក្នុងការការពារខ្លួន ខណៈរដ្ឋឯកោមួយនេះកំពុងប្រឈមមុខនឹងគោលនយោបាយអរិភាពពីអាមេរិក ហើយការបង្កើនកម្លាំងយោធានៅកូរ៉េខាងត្បូងកំពុងគំរាមកំហែងដល់សន្តិសុខនៅឧបទ្វីបកូរ៉េ ។

លោកបាននិយាយថា “យើងមិនពិភាក្សាអំពីសង្គ្រាមជាមួយនរណាម្នាក់ទេ ប៉ុន្តែជាការការពារសង្រ្គាមដោយខ្លួនឯង និងបង្កើនការរាំងស្ទះសង្គ្រាមដើម្បីការពារអធិបតេយ្យភាពជាតិ” ។

បើទោះបីជាមានសេចក្តីថ្លែងការណ៍ពីទីក្រុងវ៉ាស៊ីនតោនថា ខ្លួនមិនមានអារម្មណ៍បង្កើតសត្រូវជាមួយទីក្រុងព្យុងយ៉ាងក៏ដោយ ក៏ការអះអាងទាំងនោះពិបាកនឹងជឿជាក់ណាស់ ដោយសារការបន្តការវិនិច្ឆ័យខុស និងសកម្មភាពរបស់អាមេរិកនាកន្លងមក ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ ស្ងាត់ៗ WHO ធ្វើការបញ្ជូនឧបករណ៍វេជ្ជសាស្ត្រកូវីដទៅ កូរ៉េខាងជើង