ចាក់វ៉ាក់សាំងកូវីដបាន៣ដូស មានឱកាសធ្លាក់ខ្លួនឈឺធ្ងន់ត្រឹមតែ ០.០០០០១% ប៉ុណ្ណោះ

យោងតាមទិន្នន័យដែលចេញផ្សាយដោយក្រសួងសុខាភិបាល អ៊ីស្រាអែល បានឱ្យដឹងថា ករណីឆ្លងវីរុសកូវីដ-១៩ ស្ថិតក្នុងសភាពធ្ងន់ធ្ងរចំនួន ៤៦០​ នាក់ កាលពីចុងសប្ដាហ៍មុន មនុស្សប្រមាណ ៧% (៣២នាក់) ក្នុងចំណោមនោះជាអ្នកបានចាក់វ៉ាក់សាំងចំនួន ៣ដងពេញលេញ។

រដ្ឋមន្រ្តីក្រសួងសុខាភិបាល លោកសាស្ត្រាចារ្យ Nachman Ash បានប្រាប់កាសែត The Jerusalem Post ថា “ខ្ញុំមិនហ៊ានថាមនុស្សចំនួន ៧% ជាចំនួនច្រើនឡើយ។ ប៉ុន្តែអ្វីដែលគួរកត់សម្គាល់ ទោះបីចាក់វ៉ាក់សាំងលើកទី ៣ រួចរាល់ ក៏មិនមានប្រសិទ្ធភាព ១០០%ដែរ។”

លោកបន្តថា ត្បិតមានករណីឆ្លង ហើយវិវត្តជាអាការធ្ងន់ធ្ងរពិតមែន តែវាជាភាគរយតិចតួចជាទីបំផុត ព្រោះមនុស្សគ្រប់រូបមិនមានអង់ទីគ័ររឹងមាំទាំងអស់ឡើយ ពោលគឺចាក់វ៉ាក់សាំងពេញលេញក៏ដោយ នៅតែមានឱកាសឆ្លង ជាពិសេសអ្នកមានប្រព័ន្ធភាពស៊ាំចុះខ្សោយ។

គិតមកទល់ពេលនេះ ប្រជាជនអ៊ីស្រាអែលជាង ៣លាននាក់បានចាក់វ៉ាក់សាំងពេញលេញរួចហើយ បូករួមទាំងអ្នកចាក់បានពីរដូស និងអ្នកចាក់ដូសជំរុញ។

គួរបញ្ជាក់ថា ទិន្នន័យកាលពីថ្ងៃទី ០៨ ខែតុលា ឆ្នាំ២០២១ អ្នកចាក់វ៉ាក់សាំងដូសជំរុញចំនួន ៣២ នាក់បានឆ្លងកូវីដ-១៩ ហើយមានរោគសញ្ញាធ្ងន់ធ្ងរ ដែលគិតជារួមក្នុងចំណោមអ្នកចាក់វ៉ាក់សាំងដូសទី៣ទាំងអស់ អ្នកជំងឺដែលឈឺធ្ងន់មានតែ ០.០០០០១%ប៉ុណ្ណោះ៕

ប្រែសម្រួល៖ សន្យា

ចុចអាន៖ មិនខុសពីប្រទេសដទៃ កូរ៉េខាងត្បូង ត្រៀមរៀនរស់នៅជាមួយកូវីដរយៈពេលវែង

ចុចអាន៖ វិធានការមួយសំខាន់ បើធ្វើមិនបាន វីរុសកូវីដបំប្លែងខ្លួនថ្មី នឹងលេចចេញនៅឆ្នាំក្រោយ