ថៃ ដំឡើងម៉ាស៊ីនតេស្តកូវីដ ចេញលទ្ធផលត្រឹម ៣៥នាទី មានប្រសិទ្ធភាព១០០% ដូច PCR   

មន្ទីរពេទ្យ Ramathibodi ត្រូវបានបំពាក់ដោយម៉ាស៊ីនតេស្តកូវីដដំបូងគេបង្អស់របស់ប្រទេសថៃ ដែលមានប្រសិទ្ធភាពយ៉ាងត្រឹមត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម៉ាស៊ីនផលិតដោយជប៉ុនឈ្មោះ Lumipulse G1200 ដែលបរិច្ចាគដល់មន្ទីរពេទ្យនេះដោយក្រុមហ៊ុន CP All បច្ចុប្បន្នបានត្រៀមខ្លួនរួចជាស្រេច សម្រាប់ការប្រើប្រាស់បន្ទាប់ពីត្រូវបានសាកល្បងអស់រយៈពេលពីរខែ​ ខណៈសំណាកចំនួន ៥០០ ត្រូវបានធ្វើតេស្ត ដើម្បីបញ្ជាក់អំពីភាពត្រឹមត្រូវនិងប្រសិទ្ធភាពរបស់ម៉ាស៊ីន។

ម៉ាស៊ីនទាំងនោះ ត្រូវបានគេប្រើយ៉ាងទូលំទូលាយក្នុងព្រលានយន្តហោះ នៅប្រទេសជប៉ុនសម្រាប់ការធ្វើតេស្តរកមេរោគកូវីដ-១៩ ដោយលទ្ធផលតេស្តបញ្ចេញក្នុងរយៈពេលត្រឹម ៣៥ នាទី។

លោក Ekawat Pasomsub ប្រធានផ្នែករោគវិទ្យា នៅនាយកដ្ឋានរោគសាស្ត្រ នៃមហាវិទ្យាល័យវេជ្ជសាស្ត្រ Ramathibodi បាននិយាយថា ម៉ាស៊ីននេះផ្តល់លទ្ធផល ៩៨ភាគរយ សម្រាប់ប្រតិកម្មនិង ១០០ភាគរយ សម្រាប់ភាពជាក់លាក់។

លោកវេជ្ជបណ្ឌិត Ekawat បន្តថា លទ្ធផលទាំងនេះគឺប្រសើរជាងឧបករណ៍តេស្តរហ័ស ហើយស្ទើរតែមានប្រសិទ្ធភាពដូចទៅម៉ាស៊ីនតេស្តធំ RT-PCR ដែលទទួលស្គាល់ដោយអង្គការសុខភាពពិភពលោក។

ម៉ាស៊ីន Lumipulse G1200 គឺមានភាពងាយស្រួលក្នុងការប្រើប្រាស់ ហើយការធ្វើតេស្តគឺធ្វើឡើងតាមរយៈការវិភាគអង់ស៊ីមទឹកមាត់។

លោកវេជ្ជបណ្ឌិត Ekawat ក៏បាននិយាយផងដែរថា ម៉ាស៊ីននេះមានសារៈប្រយោជន៍យ៉ាងខ្លាំងសម្រាប់ការធ្វើតេស្តទ្រង់ទ្រាយធំ ដែលអាចកាត់បន្ថយបន្ទុកការងាររបស់បុគ្គលិកពេទ្យ ហើយកាន់តែមានសុវត្ថិភាព ដោយសារតែវាចាំបាច់ប្រើតម្បាររុកច្រមុះ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ពិតដូច ថៃ ថាទេ? អ្នកកើតផ្តាសាយ ធ្វើតេស្តរហ័ស ក៏ឃើញកូវីដដែរ